Hakha ah Facang Cheukhat Man a Kai
——–
March 15 thawk hrawng in Hakha ah facang man a kai deuh, tiah Hakha facang dawr ngeitu hna sin in kan theih. A man a kai deuhmi facang hn cu #Kananhmwe: Kananhmwe hi ahlan ah dip khat ah 53,000 a si i, atu ah 55,000 ah a kai. #Ayeyamin: Ayeyamin hi ahlan ah dip khat ah 50,000 a si i, atu ah 53,000 ah a kai ve. Facang hi ahlan i a rak phan tthingmi cu an man a kai lo nain atuhnu ah a rak phanmi pawl belte hi an man a kai hna.
Dawr ngeitu pakhat nih, “Ahlan kan lak ciami chung in a taangmi cu kan kaiter lo. Asinain, a thar kan cahmi cu a kai. Hi facang man a kaimi hi March 15 hrawng in khan a si cang. Ralkap uknak ruang ah a kaimi cu a si lai lo tiah ka ruah. March le April thla hi facang man a kai caan a si tawn. Kum dang zong ah hi caan ah hin facang man a kai tawn,” tiah a chim.
Ralkap nih uknak an lak hnu ah Mynamar ramchung facang man hi atu tiang ah cun hmun tam deuh ah a kai rih lo. Asinain, datsi/diesel man belte February thla chung in a rak kai cang. Cun, Yangon khuachung ah cun facang si loin nitin eidin tete (Coffee Mix, tbk) dawr cheukhat ah an man a kai deuh thluahmah ve.
Atu bantuk in ralkap nih uknak a tlaih peng i ramchung buaibainak a um peng ahcun chawlehthalnak fak chin in a hnorsuan lai i, Myanmar ramchung misifak tam u nih harsatnak an tong kho, tiah WFP zong nih nizan nai ah ralrin peknak bia a chim. Min Cung Sang, The Chin Journal
Be First to Comment