Kan Ralkap Hna Nih Hakha Ah SAC Ralkap An Kah Hna
Hakha Cawbuk Check Gate Hngaktu SAC Ralkap Le Palik Kah An Tong. Chin ramkulh, Hakha Cawbuk sang SAC ralkap check gate cu Chin ralkap nih an va kah, tiah theih a si.
Nihin Macrh ni 19 zing suimilam 6:00AM-7:00AM kar ah Cawbuk sang SAC ralkap check gate cu Chin ralkap nih an va kah i, ralkap le palik a thimi le aa hliammi an um le um lo cu theih a si rih lo, tiah tualchung mi pakhat nih a chim.
SAC check gate hngaktu ralkap le palik kah an ton caah rian herh ruah ah Hakha lei kal a duhmi hna zong an kal kho lo, tiah tualchung mi pakhat nih The Chin Post ah a chim. Credit: The Chin Post
Relchap; CNA Ah Phaisa Tho Hrimhrim Uh! Mizei maw cu CNA thatlonak rumro chim ah chun ni nan tla kho. CNA nih a rak ka peng, nitlang lakah an rak kan dir ter, kan facang an kan lak piak, tiin a phunphun in a rak hrang i, ai cinat thai lomi nan tampi ti ka theih.
Mihrut hna Kawl nih kum 70 chung kan ram cio cungah sal bang an kan uk pengmi hi a fak nan ti deuh lo maw? Kan ram cio cungah kan holh le ca hmanh cawn a kan sianh lo, a kan tlaih hrem, a kan vuak, an kan thenthek i a kan thah. CNA nih a hlanlio ah voikhat a rak in bengh mi le vuak mi i cinken riangmang in maw Kawl nih kum 70 sal a kan tlaihmi cu nan i philh ter?
Kadua le hna lungfim a cu tuk cang! Kawlpa thah nakin CNA pa bengh a fak deuh i nan ruah peng rih ahcun Pathian nih an ser hnawhchan kha ai palh le asi lai dah! Pathian nih cun zeibantuk lungthin va ngei hmanh law Laimi/Chinmi ah an ser ko cuh! Kalapa thah le Kawlpa thah nakin Laipa bengh a fak deuh in tutiang kan ruah rih asi ahcun awtaw mei kha nai bunh rih a si lai.
Tutan $25 million project ahhin Chinmi paohpaoh i tel dih hna usih, CNA pa nih a rak ka bengh, a rak ka vuak, tiin a luancio kum 20 lio thil kha i cinken i tim peng hna hlah usih. Na unau an thi cuahmah cang, na ram an khangh cuahmah cang, na miphun cii an hmih cuahmah cang, na tukbakhur kha suimilam 2 hrawng i domh law khua vun ruat tungman than hmanh, na lung a fim than hrimhrim lai.
Tutan $25 million nih cun kan ralkap pawl hi a ven khawh cang hna lai, ralhrang lawng si loin AA le ZRA hmanh a ven khawh rih lai. A biapi taktak mi asi caah thapi chuah cio ko hna usih, a luancio caan ahcun kan nulepa zong nih an kan vuak cio ko cuh, kha tluk ahkhan hei ruat ko. Credit: Chelsea Bawi
