Press "Enter" to skip to content

Karen Ralkap Le Min Aung Hlaing Ralkap Kahdohnak Ah SAC Minung 33 Thi Le Zaam An Si

Karenni Ramkulh Kahdohnak Ah SAC Ralkap 16 An Thi, 17 An Zaam: Karenni (Kayah) ramkulh chung, April zarhthumnak chung i a chuak mi kahdohnak ah SAC ralkap 16 an thi i, tamlakte hliam an tuar, tiah Karenni mizapi vengtu ralkap nih cathanh an chuah. Pruso peng Htalay(ထားလဲ) le Naan Phe ( နန်းဖဲ) karlak ah rallam a sialtu SAC ralkap hna cu tualchung mizapi vengtu ralkap nih an kah hna i SAC ralkap 17 cu an zaam,

SAC ralkap a zaam mi cheukhat cu Karenni mizapi vengtu ralkap sin ah an i fonh ṭhan, tiah theih a si. Cu kahdohnak ah cun KNDF lei in ralkap 2 an nunnak a liam, tiah KNDF nih cathanh an chuah. April zarhthumnak chung ah Moebe, Wari Su Plai( ဝါရီဆူးပလိုင်) le Wari Kaw Khu (ဝါရီကောခူ) khua, Demohso peng, Dawkami le Oo Khu Ri( ဥခူရီ) khua,

Pruso le Baw – La – Khe ramri um Htalay (ထားလဲ) le Naan Phe khua tibantuk hna ah kahdohnak a chuak. Demoso peng Dawkami khua pawngkam hrawng ah April 14 in April 23 tiang kahdohnak a fak i, cu bantuk in Moebe peng Wari Su Plai khua pawng zong ah April 15 in kahdohnak a chuak cang. April 15 ah Loikaw khuapi Htee Tta Mah (‌ေထးတမ) veng chung ah SAC ralkap le mizapi vengtu ralkap hna kahdohnak a rak chuak i SAC ralkap lei nih mipi umnak hmun cu hriamngan in an kah hna i,

April 16 ah Loikaw khuapi Chike ( ချိကယ်) sang ah kum 8 ngakchia pakhat zong an kahthah tiah, KNDF nih cathanh an chuah. Cu pinah SAC ralkap hna nih zarhkhat chung ah Loikaw le Demoso peng chung ah inn 14 an khangh i hriamngan kahnak ruang ah Demoso, Pruso le Loikaw peng ah inn 8 an rawk, tiah an langhter. (Mai Flowery Par, TCP Journalist) Crd; The Chin Post

Relchap; Chin ramkulh, Hakha ummi Hakha Education Degree College ah Distance Education kum khatnak cachimtu pawl cu April 20 in May 18 tiang training an kai lai, tiah kan theih. Uknak laak hnu in Chinram kulh ah a voikhatnak cachimtu training an kai i, hi training a kai mi hna hi Hakha peng le Falam peng in minung 30 an kai, tiah Chin ramkulh SAC nih an thanh.

Hakha Education Degree College Principle hi Mi Ngio Ngio Shing(မိညိုညိုရှိန်) a si. Training a kai mi hna donnak ah Pu Ngun San Aung nih SAC kuttang fimcawnnak ah biatak tein an ṭuannak kong, atu Education Degree hi kawlram a cung lei um mi ca ah Sagaing Education University, kawlram thlanglei um mi hna ca ah Yangon Education University ah an cawnnak kong, atu cun Education College 25 ah an cawng cang hna i cachimtu pawl ca ah lam ṭha aa hun cang nak kong a chim, tiah kan theih.

Chaung U Peng Inma Khua Kam Ah SAC Ralkap Bomb Puah An Tong I 28 An Thi: Sagaing ramṭhen, Chaung U(ချောင်းဦး) peng Inma(အင်းမ) khua kam ah SAC ralkap le Chaung U PDF cu April 23 ah an i kah hnu in SAC ralkap pawl cu bomb puah hnawh an tong i 28 an thi, tiah Chaung U peng PDF nih cathanh an chuah. Chaung U peng Kinmontaw(ကင်မွန်းတော်) khua um mi pyusawtee le SAC ralkap 60 hrawng cu Inma khua lei an rat lio ah Chaung U PDF Company 1 nih an kah hna, tiah theih a si.

Cu kahdohnak cu, April 23 zing sml 7:00 hrawng in aa thok i, Chaung U PDF nih an hmanh mi bomb cu SAC ralkap nih an hrawh caah bomb cu a puak kho lo. Sml 3 chung hrawng an i kah hnu ah Chaung U PDF cu Inma khua lei ah an kir, tiah kan theih. Cu kahdohnak ah cun SAC ralkap 1 a thi i, hliam tuar mi zat cu an hngal kho lo. Chaung U PDF lei in hliam tuar an um lo, tiah theih a si.

SAC ralkap pawl nih Inma khua chung ah thil an fir i, an duh poh in an tuah hnuah inn 70 leng an khangh i, khua chung um khua mi pa pakhat zong an thah, tiah theih a si. SAC ralkap an kir hnu in Chaung U in Kinmontaw khua lei ah thazaang chap ding a kal mi SAC ralkap 50 hrawng cu Chaung U PDF, Bomb Company nih bomb in an puah hna caah SAC ralkap 27 an thi i, Chaung U khua ah an kir ṭhan, tiah cathanh an chuah. Crd; The Chin post

Be First to Comment

Leave a Reply

Your email address will not be published.