Press "Enter" to skip to content

Karen Ralkap Nih Min Aung Hlaing Ralkap Bawi Telh In Minung 26 Bak An Tlaih Hna

Kahdohnak ruang ah a rawk mi Electric tower remh ding in a kal mi SAC ralkap bawi (တပ်မှူး) 2 le an kuttang rianṭuantu minung 26 cit mi motor pakhat cu Shan ramkulh Phekhone(ဖယ်ခုံ) peng, Loikaw-Phekhone lam pawng ah Electric thilri he April 21 ah tlaih an si, tiah KNDF nih April 25 ah an thanh. An tlaih mi hna cu KSP ah an kuat hna i SAC ralkap he i bawm in rianṭuan mi a si, tiah taza cuai khawh an si nakhnga tawlrel cuahmah lio a si.

KNDF nih SAC tang ah rian a ṭuan mi hna cu dantatnak a pek hna lai caah SAC kuat tang ah rianṭuan ti lo ding in forhfialnak zong an tuah, tiah theih a si. KNDF nih an tlaih mi hna cu theihthiamnak tampi he tlaih an si caah an chungkhar, cingla rualchan, hawikom hna le mizapi hna cu thinphang lo ding in le social media ah a dik lo mi thawng, bia chokvai hna cu i zumh lo ding in theihternak cathanh an chuah fawn.

Thilin Peng Kahdohnak Ah Bridage 11 In SAC Ralkap Pakhat Tlaih A Si: Magwe ramṭhen Thilin(ထီလင်း) peng Agyi Wa Bin(အကြည်ဝါးဘင်း) khua pawng ah SAC ralkap le Yaw Defense Force(YDF) cu nizaan April 25 zing Sml 7 hrawng ah an i kap i, Bridage 11 in SAC ralkap Naing Lin Aung(နိုင်လင်းအောင်) cu hriamthil zeimawzat he tlaih a si, tiah YDF nih an thanh.

Kahdohnak cu minutes 45 chung a rau i SAC ralkap hna cu YDF batallion 6, 7 le 14 nih an doh hna. Cu kahdohnak ah cun SAC ralkap a thi mi an tam kho ti a si i, zeizat set dah an thih fiang tein langhter a si lo. YDF lei hliam tuar an um lo, tiah theih a si. Tlaih a tong mi SAC ralkap Naing Lin Aung sin ah MA 3 meithal zuun 1, kuanbawm 3, bomb(mine) lung 1, kutcheh bomb 1, RPG kuan 1, 5.56 kuan 216 le hrimthil dang lak a si. Naing Lin Aung cu phung ning tein kan hren chung rih, tiah YDF nih thawng an than. Crd; The Chin Post

Relchap; Phone Sal Kan Tam Cang Rua 😁😁!
>>>>>>>>>>>>>>>>>>>>>>>>>>>>>>

Thiamsang pawl nih tuchan minung nih Phone kan hmanning, cit-hlatnak an tuah i an hmuhmi cu hihi a si: “Pa zatuak 46% nih zingkaa an thawh sin, ihkhun in an ttum hlan ah Phone an tawng hmaisa i Nu zatuak 55% nih zingkaa ihkhun in an ttum hlan ah Phone an tawng hmaisa” tiah an ti. Smartphone hmangmi hna lakah nu he pa he zatuak 71% cu an ih khun cungah tikah an phone an luu kam te ah an chiah i an i hngilh tiang phone an tuai ti si😅

Vawlei cungpi huap in an tuak tik ah, minung pakhat nih nikhat ah suimilam 5 hrawng hi Phone kan tawng ti a si. Hihi phone a tawng bal lomi nupi papi le ngakchia telh chih in tuak a si caah cheukhat cu nikhat suimilam 15, 16 Phone a tawngmi zong kan um lai tinak si cu.. Hi tluk taitai in Phone kan tonghmi hi, zei ko dah kan tuah nak? timi cit-hlatnak an hun tuah tthan tik ah hihi an hmuh tthan:

“Phone hmangmi vialte lak i zatuak 23% lawng nih an herh bakmi kawlnak le fimthiamnak cawnnak ca ah an hman i zatuak 72% tluk nih, a herh huaha lomi mi hmanthlak zoh, hngalh huaha lomi minung kip chonh, facebook a lu le taw cul dihnak le mi hmanthlak comment nak tuktak lawng ah Phone an hman ti a si. Hihi a dik hrimhrim lai tiah kei cu ka zumh bak! Nang zeitindik na ruah ve?

Hi hi nihin vawlei mi tam deuh nih, nitin kan caan kan hmanning cu a si cang. Phone kan rak hmuh bal hlan ah khan cun, ih lai le thawhkaa thlacam lo cu Laimi nih a phung ah kan rak ruat lo. Sihmanhsehlaw a ba-thla i Phone kan i cawk khawh i mi phaisa hal chawm in internet balance kan i rawn khawh hnu tu chan ahcun, Laimi lak ah ih lai le thawhkaa thlacammi kan tlawm ngaingai cang; phone nih thlacam caan a chuh!

Nu le fale caah caan an pe kho huaha ti lo! Pasal le nih nupi caah caan an pe kho huaha ti lo! Ihkhun cung ihtti hnu hmanh ah, nu le va bia nuam i ruah caan pek a har cang; mah le Phone veve zoh i zoh zuam ti lo in aa hngilh thaimi nupa Laimi lak ah kan tam cang! Nu le va, nupa le fale karlak biasawng tlawrh le caan hmantti a tlawn ttung, Online ah muidawh le mirum lawngte kan hmuh a si fawn ttung.

Cucaah mah le nupi/pasal le fale tlaihchannak a zawr i Online ah lungthin a chiami kan tlawm ti lo. Nuva tampi a tthenter cang hna, tampi tthen rih a kan timh! Cucaah kan Phone nih maw a kan hman lai kanmah nih dah kan hman lai? tihi fakpi in ruah caan a cu. Tthat hnemnak chuahpitu, fimnak petu le pawcawmtu ah a hmang thiammi hna ca ahcun thluachuah a si ko.

Sihmanhsehlaw sifahtertu, min chiattertu le chungkhar ningzahtertu ah a hmangmi hna ca ahcun chiatserhnak a si ko cang hih! “Minung hi a kan uktu poah i sal kan si. Phone nih a ukmi cu Phone sal kan si ko”.. Kan herhnak ah Phone hmang hna u sih..Phone nih a ka hman cang ko rua, na ti ahcun ttihnung dirhmun ah na dir cang khah.. By; Hrambik Lian

Be First to Comment

Leave a Reply

Your email address will not be published.