Kareni Ram Chungah Ralhrang Le Mipi Hriamtlai Kahdohnak Ah Mipi 70 Leng An Nunnak Liam
Thlahnih chung kahdohnak ah mipi 75 an nunnak a liam, 2022 March 4 – Thlanglei Shan, Moebye khua le Karenni ram chungah ralhrang le mipi hriamtlai phu karlak ah kahdohnak a fah tuk caah January le February thlahnih chungah mipi 75 an nunnak a liam tiah Progressive Karenni People Force (PKPF) nih March 2 ah thawng a thanh.
2022 January chungah mipi 49 an thi i February chungah 26 an thi tiah a langhter. Hramhram in uknak lak a si hnu 2021 February 1 in 2022 February 8 tiang ah mipi a thimi 221 an si i tlaihkhih a tongmi 220 an um tiah a langhter. A luancia January 7 in February thla dongh tiangah Kayah ram chungah ralhrang nih vanlawng in voi 69 a kah i biakinn 10 le mipi inn 649 a rawk tiah a langhter.
A luancia February 16 thokin ralhrang nih Moebye le Nangmekhon khua ah thazang tampi in kahdohnak a tuah caah mipi hriamtlai phu pawl he fak tuk in kahdohnak a chuak. Ralhrang nih jet vanlawng le hriamngan in an kah tuk hna caah mipi a thimi an um i mipi hriamtlai phu nih hnu an kirtak hna.
Kayah ram chung kahdohnak ah mipi a thimi an um lo, PDF pawl nih ralzaam buk ah mipi thuam in an i dor caah himnak ruat chih buin kan tuahmi thil cu a um tiah Zaw Min Htun nih RFA ah a chim. Kayah ram chungah a luancia 2021 May 22 in 2022 February 20 chungah kahdohnak a tam caah mipi 170,000 hrawng himnak hmun ah an zaam tiah Karenni State Consultative Council (KSCC) nih March 1 ah a thanh. The Chinland Post
Ralzaam pawl harnak um lo tein an ṭhutdir khawhnak hnga kan tawlrel cuahmah rih ko lai tiah Mizoram Chief Minister nih a chim. 2022 March 3 – Mizoram chungah a rak zaammi Myanmar ralzaam hna harnak um lo tein an ṭhutdir khawhnak hnga kan tawlrel rih ko lai tiah Mizoram Chief Minister Pu Zoramthanga nih a chim.
Mizoram ah an tuahmi Assembly Session ah a dohtu INC party hluttaw palai Lalrindika Ralte nih Myanmar ralzaam pawl he pehtlai in a biahalnak a lehmi a si. “Ralzaam hna har lo tein an ṭhutdir khawhnak, eidin tirawl caa le a dangdang an herhmi zong kan tawlrelpiak rih hna lai. India cozah zong bawmhhal chap a si i a kan bawmh ko lai tiah zumhnak ka ngei” tiah Pu Zoramthanga nih cun a chim.
Mizoram ah ralzaam an tam chin lengmang, a biapi in Chin ramkulh ah ralhrang nih raltuknak fak tuk a tuah caah Chinmi hna Mizoram lei ah a lutmi an tam deuh chin thluahmah. Mizoram cozah nih cazin a ngeihmi ah ralzaam 24,289 an um tiah Mizoram Chief Minister nih Assembly Session ah a chim.
Ralzaam hna hi Aizawl khuapi telh in ramṭhen 11 ah dirhmi ralzaam camp pawl ah an um i Mizo cozah, NGO le biaknak lei phu pawl nih bawmh an si tiah a chim chap. “Ralzaam an karh chin, Chin ramkulh in a raami an tam, Mizoram cozah, NGO, University phu pawl le mipi hna nih bawmh a si. Ralzaam pawl zong nih lawmh bia an chim lengmang” tiah Mizoram Chief Minister nih a chim fawn.
India ram cu UN Convention on Refugees hnatlaknak ah min a thut lo caah Central cozah nih direct in a bawm kho hna lo nain Mizoram cozah nih bawmhnak pe dingin kan hal tiah Pu Zoramthanga nih cun a chim. Ramkomh Kawlram ah hramhram in uknak lak a si hnu ah mipi hriamtlai phu le ralhrang karlak ah kahdohnak a fah tuk caah Sagaing ramṭhen le Chin ramkulh mipi hna cu Mizoram lei ah zaam dih a si.
