Karenni Ralkap Hna Nih SAC Ralkap Tam Tuk Lawmmam An Thah Hna, An Meithal Thatha Le Hriamthil Ceilak An Lak Piak Hna
Demosoe Kahdohnak ah SAC Ralkap 30 Tluk An Thi, Meithal Le Zen-Kuan Tampi An Laakpiak Hna. Karenni ramkulh, Demosoe peng Dawtagyi khuakomh Dawngyi khua pawng ah SAC ralkap le Karenni hriamtlai kar ni hnih chung kahdohnak a chuak i, SAC ralkap 30 hrawng an thih pin ah an meithal le zen-kuan tampi kan chuh hna, tiah Karenni raltuknak lei ṭuanvo latu phu chungtel pakhat nih a chim.
April 16, zing suimilam 7:30 hrawng in aa thawk i Demosoe peng nichuahlei, Dawngyi khua lei ah SAC ralkap 170 hrawng nih rallam an sial caah, KA, KNDF ṭangṭi phu hna nih an kah hna i April 17, tiang kahdohnak a zual. Ni hnih chung kahdohnak ah SAC ralkap 30 hrawng an thi i, an meithal le zen-kuan tampi zong an laakpiak hna, tiah theih a si.
“SAC ralkap cu 20 in 30 kar hrawng an thi lai. Kanmah lei in KA ralkap pakhat nih a nunnak a pek ve. Hliamhma pumi zong pakhat hnih an um,” tiah Karenni raltuknak lei ṭuanvo latu phu in chunngtel pakhat nih cun a chim.
SAC ralkap nih April 16, zanlei suimilam 1:30 hrawng ah Fighter in voi 1, zanlei suimilam 3:30 hrawng ah voi 1, April 17 zan suimilam 12:00 hrawng ah voi 1, April 18 zanlei suimilam 4:00 hrawng ah voi 1 bomb a thlak. Hriamngan zong in voi tampi an kah, tiah theih a si.
Cu kahdohnak ah KA | KNDF B/10 | B/05 | B/06 | B/01 | B/16 | B/15 | KNDF ETD le Loikaw PDF hna i bawm in an kah hna. SAC ralkap cu Tatma 66 kuttang Khah Mah Yah 15, 55 le 80 an i bawm ve, tiah theih a si. The Chin Post
