Kawl Kumthar Ah Min Aung Hlaing Nih Hitin Hin Kahdohnak Kong He Pehtlai In A chim

Kumthar chung ah ramchung kahdohnak a fak deuh kho, Rampi uknak laak hnu kahdohnak ramchung ah ni fatin a chuak nain uknak hramhram in latu ralhrang lutlai Min Aung Hlaing nih cun, “Tukum hi remdaihnak, kahdoh daihnak ni,” kan tuah khawh hrimhrim lai tiah kawl kumthar ni biatawi chimnak ah a chim. Ramkhel lei a kherhlai mi le ramkhel minung hna nih cun, “Hriam i tlaih in ralhraang kan doh mi hi an thazaang umek in dohthan an timh mi zong a si kho.

Cun, anmah an i timh mi 2023 kum thimnak hi a tak in tuah tak an i timh mi zong a si kho,” tiah ramkhel lei minung nih cun an chim. Tu kum Kawl kumthar (Ti toih ni) hi kum dang he i khat loin Kachin, Kayah, Karen, Chin, Sagaing, Magwe, Bago le Yangon pawl ah kahdohnak fak ngai in a chuak i rammi ralkap chung in siseh, ralhraang lei in siseh a thi mi le hliam a tuar mi an tam tiah theih a si.

Matupi le Mindat hauka gate lam a zawh mi poh kah ding in nawl chuah mi a zulh duh lo caah ralhraang Captain Yin Ko Oo thong an thlak, Matupi-Mindat lam hauka gate pawng a kal mi poh kah ding in Biohahmu nih nawl a pek mi zulh duh lo in a al cah Matupi-Mindat luhnak hauka Gate a hngaktu Captain Yin Ko Oo cu anmah ralhraang lila nih thong an thlak tiah theih a si. Cuka hauka gate an hngah mi a pal mi poh kah ding in Biohahmu nih nawl a pek hna nain ralhrang Captain Yin Ko Oo le a kuttang ralkap pawl nih theihthiamnak in nihin tiang mizapin cu an kal ter zungzal hna.

“Cpt. Yin Ko Oo cu cunglei upa nih chekhlatnak an tuah lio ah, ‘sualnak ngei lo rammi ka kap kho hna lo. Biohahmu, nangmah hi tah kah ding si law na duh ve lai maw,’ tiah biahalnak a tuah chin,” tiah ralhrang chung in thawngpe tu pakhat nih a chim. Cpt Yin Ko Oo hi thong an thlaknak ni hnih thum hrawng si cang i zeitik tiang thong a tla lai a fiang rih lo.