Kawlram CDM Rak Tuahnak Hmanthlak (2) Nih World Press Photo Laksawng A Co!
Kawlram dohthlenhnak he pehtlai in hmanthlak (2) cu kum 2022 chung world press photo zuamnak ah laksawng an hmuh tiah March 25 ah cathanh an chuah.
Laksawng hmuhnak hmanthlak (1) cu chai tiah min pekmi hmanthlak a si i, a min hngalh lomi nih a kuat. Cu chai nih cun chanthar hriamnam tihnung meithal a tlaitu SAC ralhrang ralkap rual cu mipi nih chai bakin lehrulhnak an tuahmi nih hin Kawlram mipi nih ralhrang ralkap cungah zeitlukindah an huat, zeitlukindah lehrulh duhnak lungthin an ngei timi a hmuhsak.
Laksawng hmuhnak hmanthlak dang (1) cu Kawlram dohthlenhnak tiin min pek a si i, hmanthlatu cu Taamui ummi Sacca nih a rangmi le a dummi in a thlakmi a si.Crd: Zalen
RELCHAP…Myanmar Ramri India Lei Kap Ah Tlor Thing An TlaihIndia ram Minipur state, Kamjong pengkomh ah phung nih onh lo mi Rupi sing 64( sing 1500kyats) man tlor thing he minung 3 cu Assam rifile March 21 ah an tlaih hna tiah theih a si.
Tlor thing an tlaih nak hmun Kamjong pengkomh hi Tamu pengkomh Myohtit(မြို့သစ်) le Humalin(ဟုမ္မလင်း) peng he aa neih nak ah a si i , an tlaih mi minung le tlor thing hi khoika ramri gate indah an luh ti cu an langhter lo.
SAC nih uknak an lak hnu in upadi timi a umlo tluk a si cang caah Tamu cunglei , Khampat , Chin ramkulh le Sagaing ramthen i thing manfak pawl cu an hau hna i SAC ralkap sin ah phaisa an pek i India ram lei ah nitin in an phurh tiah tualchung mi hna sin theih a si.
Chin, Rakhine, Kachin le Shan ram thlanglei hmunhma hna ah umnak inn zaamtak in le harsa ngai in a ummi chungkhar 46,000 leng caah tiin chungkhar pakhat ah 65,000 mmk bawmhnak pek an si tiah pLIFT nih March 25 ah cathanh an chuah.
Hi bawmhnak hi World Food Program (WFP) he i fonh in tuahmi a si i, Covid-19 zawtnak ruangah harnak a tongmi chungkhar hna caah a hlei in timhtuah mi a si tiah an cathanh ah cun an langhter.
” Harsatnak a tongmi chungkhar hna caah phaisa lut ngei ti loin a lamkip ah harnak an ton lio ah an caah a tha hnemmi eidin le an ngamdamnak caah a bawmhchanh ko hna lai” tiin LIFT in director of fund Sara Netzer nih a chim.
LIFT nih 2009 kum thok in Myanmar ram mipi 12.8 million leng bawmhnak kan pekkhawh cang hna tiah an cathanh ah an langhter.
#Minmu Khuapi Ah Ralveng SAC Ralkap Bomb Puahhnawh An Tong , 2 An Thi, 8 Hliam An Tuar, SAC Ralkap Kahnak Ruangah Lung Zawtnak A Ngeimi 1 Hliam A Tuar, Yesagyo Palik Sakhan Le Tuang Thar Palik Sakhan Zong PDF Nih An Kah
Sagaing ramthen, Minmu peng, Kyauk Tine ( ေကျာက်တိုင်) pawngah March 24 zan Sml 7:20 hrawngah ralven i ai chawkmi SAC ralkap 50 hrawng cu bomb an puahhnawh hna i 2 an thi i 8 hliam an tuar , bomb puah an si hnu ah SAC ralkap nih meithal an puah caah lungzawt nak a ngeimi civil pakhat hliam a tuar tiah Knight Commander ( MMU) phu nih Yangon khit thit ah a chim.
” Zaan ah ralven i ai chawkmi hna i an chuahnak ah bomb kan hmanh i An rak chuah bak in a puak. Minung 2 an thi tiah fiang tein kan chim khawh. Bomb an i lamh bak in voi 200 leng a kan kah ve. An kahmi kuan nih lungzawt nak a ngeimi mipi pakhat a hliamh tiah theih a si. A hliamhma hi a fak tuk cu si lo” tiah Knight Commanders (MMU) in tuanvo ngeitu pakhat nihcun a chim.
Cu kahdohnak ah cun Sagaing pengkomh Battalion (1), Myiang peng mizapi vengtu ralkap phu (MRA), Zamani Revolution Force, Knight Commanders , hna phu 4 i bawm in an kahdoh hna hi a si .Kahdohnak a dih in mizapi vengtu ralkap phu hna cu a hliammi um lo in hnu an tolh kho .
Magwe ramthen, Yesagyo peng palik camp le Mandalay ramthen, Tuang Thar khuapi palik sakhan hna cu kutcheh bomb, 40 mm hna in kan kah tiah mizapi vengtu ralkap phu hna nih nihin March 25 ni ah cathanh a chuah.
Yesagyo peng, palik zung cu bomb in kan cheh ko nain bomb cu a puah lo caah SAC ralkap hna nih meithal in an kah i an thianh dih tiah March zinglei ah cathanh an chuah.
Mandalay ramthen, Tuang Thar khuapi palik sakhan cu March 24 ni zan Sml 7:45 hrawngah PDF Tuang Thar phu nih 40 mm in an kah hna hnu ah khuachung umhmun a khuarmi SAC ralkap pawl nih meithal puah thlorh in an puah tiah theih asi.
