Press "Enter" to skip to content

Kawlram Minung Tam Taktak An Tlaih Hna

Thailand ram ah phung ning loin a lut i, Malaysia ram ah kal aa tim mi, Myanmar mi 40 cu Thailand ralkap nih April 6 zing ah an tlaih hna, tiah Bangkok News nih a langhter. Myanmar mi hna cu Thailand ram thlanglei ramri Sadaung (ဆဒေါင်း) pengkomh rubber dum pakhat chung ah palik le ralkap nih an tlaih hna, tiah theih a si.

Tlaih a tong mi minung 40 ah hin pa 31 le nu 9 an si. Palik nih an check hna tikah Yangon, Rakhine, Dawei le Chin ram tbk. hmun dangdang cio in an ra mi an si hna, tiah an chim. Tlaih a tong mi hna cu Sadaung palik sakhan i an kuat hna hlan ah COVID-19 zawtnak an ngeih le ngeih lo an chek hna i, an umnak ah kuat ṭhan ding in timhtuahnak an ngei, tiah theih a si.

Atu lio hrawng hi Myanmar ram lei in Malaysia ram ah rianṭuan ding in Thailand ram Ya Naung(ရနောင်း) le Kanchianapuri pengkomh ah phung ning lo in a lut mi an tam ngai i, mi tam deuh cu Thailand thlanglei pengkomh an phak hlan ah tlaih an si, tiah theih a si. TCP

Ukraine President Zelensky nih cun, “Vawlei ralpi pahnihnak hnu ah a chiahru bik mi thahnawnnak cu Russia ralkap nih an tuah i, Ukraine mipi an thahnawn hna. Hi thahnawnnak ah hin raltuknak tank an hman i lentecelhnak men bantuk ah Ukraine mipi cu an ruah i an thahnawn hna,” tiah UN National Security Council ah video file in a chim.

“Russia ralkap tuahsetnak nan hmuh ko nain UN nih action nan la ngam taktak lo. UN hi hrawh maw nan i timh? International phung vialte cu a nung ti kun lo maw? Cuti a si ṭung lo ahcun Russia hi nan zoh sawh awk a si ti lo i nan phetchem awk a si ti lo,” tiah Ukraine President Zelensky nih cun a chim.

President Zelensky nih cun UN Security Council ah VETO Power in mithahnak license a ngei mi ram pakhat he kan i tuk khan a si, tiah a chim pinah Bucha khua ah Ukraine minung a zaleng in an thah mi hna hmanthlak le video zong UN National Security ah a hmuhsak hna. Credit; The Chin Post

Be First to Comment

Leave a Reply

Your email address will not be published.