Kawlram Mipi Caah Thawngtha Tuk A Si Cang Ee!

Kum 2022 chung ah Myanmar mipi a tlawm bik 4,000,000 ca ah a herh mi eidin tirawl kan bawmh lai, tiah UN General Secretary Spokesperson Stephane Dujarric nih a chim. Yangon, Mandalay le khua ngan pawl ah minung 1.7 million ca ah eidin tirawl cu World Food Programme(WFP), UN nih a phawtzamh pin ah raltuknak le kahdohnak ruangah ramkulh le ramthen 7 ah umnak chuahtak in ral a zaam mi minung 57,000 ca zong ah a phawtzamh lai, tiah a chim chap.

Sagaing ramṭhen, Yinmapin peng chung ah um mi PDF hruaitu pakhat nih Sagaing chung ah umnak chuahtak in ral a zaam mi le inn khanghpiak a tong mi hi nifatin ngawt in an um nain UN sin in bawmhnak an hmu lo, tiah a chim. “Kan sin ah a zaam mi hna hi kahdohnak ruangah an si lo. Ralhrang nih an khuachung ah an luhhnawh hna i an tlaih hna, meithal in an kah hna, thil an lakpiak hna, an hrawhpiak hna, an inn an khanghpiak hna ruang ah an zaamnak a si,” tiah a chim chap. Credit: The Chin Post

Sagaing ramṭhen chung ah Internet line an phih ruangah tualchung PDF cheukhat hna nih Ooredoo Office Center phone an chawnh i ralrin an pek hna, tiah theih a si. Internet man an kaiter pinah Internet line an phih chap ruangah tualchung mi hna cu an thin a hung tuk i cucaah tualchung PDF cheukhat hna nih nihin March 4 zing ah Ooredoo zung cu phone an chawnh i an hro ve hna.

“Internet line rak ong zok uh, nan on lo ding si le na tower tung rak ṭhet uh, nan ṭheh lo ahcun kanmah nih kan in ṭheh/ hrawh piak hna lai,” tiah phone an chawnh hna.

Ooredoo zung phone an chawnhnak minute 2 a saumi video file cu PDF pakhat nih social media ah a tar i, “SAC ralhrang kuttang um nan si caah maw nan i lorter? Nan sualnak a tam cang, mipi nek hna hlah uh,” tiah a hro rih hna. SAC ralhrang nihcun Sagaing, Mongya, Kalay le Shwebo peng telloin a a dang Sagaing ramṭhen chung pengkulh poh MPT:Ooredoo le Telenor internet line cu nizaan March 3 zaan sml. 11 in an phih.

Depeyin Peng Chung Ah SAC Ralhrang Nih Minung 9 An Khangh Hna!: Sagaing ramṭhen chung pengkulh tam deuh ah Internet line an phih hnu in Depeyin peng chung ah SAC ralhrang nih rallam an sial thluahmah, tiah tualchung mipi humhimtu ralkap bu hna nih an chim.

Depeyin ralkap phufonh hna nih nihin March 4 cathanh an chuah mi ah “Tualchung mi minung 9 hna cu ralhrang meikhanghnak in an thi, tiah phone chawnh in thawngpang a kan pek mi ning in fehter a si” tiah an langhter. Nizaan March 3 zaan sml 11:00 ah Internet line an phih hnu in tuzing ceuka te ah SAC ralhrang nih Saipyin khuapi nichuahlei Minsuaihnit khua an luhhnawh i tualchuang mi cheukhat mei in an khangh hna i an thi, tiah Free Rangers-Depeyin ralkap pakhat nih a chim.

Atu tiang kan pehtlaih hna i thil sining kan theih khawh tawk ah Security hngaktu minung 7 meikhangh in thah an si, ti kan theih, biafiang kan hlathlai cuahmah lio,” tiah a chim chih. SAC ralhrang pawl nihcun Sagaing ramṭhen chung a tam deuh cu March 3 zaan sml 11:00 in Internet line an phih i, Sagaing pengkulh, Kalay peng, Mongya le Shwebo pengkulh 4 lawng ah internet line hman khawh a si. Credit: The Chin Post