Press "Enter" to skip to content

Kawlram Pumpi Ah SAC Ralhrang Nih Inn An Khangh Zat Thawngfiang

Min Aung Hlaing hruai mi SAC ralhrang nih uknak an laak hnu in Myanmar ram pumpi ah inn 6158 an khangh cang, tiah Data for Myanmar nih March 2 ah a langhter. SAC ralhrang nih inn 6158 an khangh mi chung ah inn 3000 leng cu tukum 2022 January le Febuary thla chung ah khangh mi an si, tiah Data for Myanmar nihcun a langhter i ralhrang nih mipi umnak khua i sel in rallam an sialnak an langhternak zong hmuh a si.

Inn 8,158 an khangh mi hna hi hmun 165 ah an si i Sagaing ramṭhen hi a tambiknak si in, inn 3600 leng an khangh cang. A pahnihnak ah Chin ramkulh a si i, inn 1100 leng a kaang cang, pathumnak ah Magwe ramṭhen a si i inn 900 hrawng, Kaya( karenni) ah inn 300 le hmun dangdang Pago, Karen: Mandalay, Shan le Tahninthary hna ah an si. Credit: The Chin Post

Mizoram chung ah aa dormi Myanmar ralzaam pawl cu harnak um lo tein an ṭhutdir khawh nakhnga Mizoram Cozah nih kan tuaktan lai, tiah Mizoram Chief Minister Pu Zoramthanga nih a chim. Mizoram ah tuah cuahmah mi Assembly session ngeih lio ah zuamcawhtu INC party in MLA Lalrindika nih Myanmar ralzaam kong he pehtlai in bia a halnak cu atu bantuk in CM Pu Zoramthanga nih a leh.

CM Pu Zoramthanga nihcun, “Ralzaam pawl cu harnak le lungretheihnak ngei lo tein an ṭhutdir khawh nakhnga pehzulh in kan ṭuan rih lai, Eidin tirawl kong ah siseh, a dangdang herh poipang kong zong ah siseh kan si khawh tawk in kan tuaktan rih ko lai. India Central cozah zong bawmh kan hal chap lai i an kan bawmh ko lai tiah kan i ruahchan,” tiah a chim.

Mizoram chung ah ralzaam hi nikhat hnu nikhat in an karh chin lemgmang, a hlei in Chin ramchung ah SAC nih raltuknak faktuk in an luhpi caah Chinram chung mipi hna cu Mizoram lei ah an rak lut peng rih i, atutiang ah Mizoram cozah cazin ning in ralzaam 24,289 an um cang, tiah CM Pu Zoramthanga nihcun Assembly meeting ah a chim. Myanmar ralzam hna cu Mizoram khualipi Aizawl le District dang 10 i ralzaam camp ah chiah an si hna i, Mizoram Cozah, NGO le Khrifabu kip nih an sikhawh tawk in bawmhnak an pek hna, tiah a chim chih.

“Ralzaam milu an karh peng i, a tam bik hi Chin State in a ra mi an si hna. Mizoram cozah, Khrihfabu, NGO, Sianghngakchia Bu le Zatlang bu hna nih bawmhnak an pek ruangah an cung ah ralzaam pawl zong nih lunglawmhnak bia an chim lengmang ve,” tiah a chim chih. India ram cu UN Convention on Refugee ah minsen a thut lo caah Central cozah in ralzaam a bawm hna lo nain

Mizoram cozah sin in indirect bawmhnak pek khawh nak ding ah kan hal, tiah CM Pu Zoramthanga nihcun a chim. Myamar ram ah 2021 February 1 in SAC ralhrang nih uknak an laak hnu in SAC ralhrang le Mizapi humhimtu ralkap karlak ah kahdohnak a chuak peng i Chinram le Sagaing ramṭhen he ramri aa tlaimi Mizoram ah minung tampi an i dor lio. Credit: The Chin Post

Be First to Comment

Leave a Reply

Your email address will not be published.