Kawlrawn Khuapi Cheukhat Kahdohnak An Thawh Cang lai I ralring Cio Uh
Mandalay ramṭhen, Mogok khua ah khuapi chung kahdohnak thok a si cang lai caah mizapi bomb khor i cawh cio ding le sii-ai timhcia tein i chiah cio ding in tualchung hriamtlai nih ralrin an pek cang hna, tiah theih a si. Nihin April 21 ah Red Wolves Of Mogok nih mizapi sin i ralrin peknak cathanh an chuah.
A rauh hlan ah khua chung kahdohnak cu kan thok cang lai, cucaah a herhmi catlap chungkhar cazin, sii-ai, eidin i khon cio ding le bomb khor i cawh cio ding in thawng kan thanh hna. Khua chung laaknak cu a rauh hlan ah kan thok cang lai caah SAC ralkap, palik le anmah he naihniam in a ummi hna he a hlatnak hmun ah nan um lai, tiah ralrin an pek hna. Mogok khua cu tlangcung ah a um mi a si bantuk in TNLA an umnak hmun zong a si.
Khayan Pengkomh Ah SAC Ralkap Mawṭaw Aa Let I Major 1 Le Ralkap 5 An Thi: Yangon ramṭhen, Khayan pengkomh ah nihin April 21 zinglei sml 5:00 hrawng ah Kamarkalukyauk(ကမာကလူကျောက်) hlei ah SAC ralkap mawṭaw aa let i, tiva chung ah a tla. Major 1 le ralkap 5 nak tlawm lo an thi i, 3 hliamhma an pu, tiah Khayan Channel nih a langhter.
Mawṭaw lu lei ah a khaltu le Major an ṭhu i, mawṭaw hnulei kuang ah ralkap 1, an dihlak 3 cu an thi colh. Sii-inn i an kalpi hna tikah SAC ralkap pahnih cu an cuap ah ti a lut an ti i, an thi ve. A dang hliamhma a pu mi pawl cu Sii-inn mawṭaw nih sml 10:00 hrawng ah a va thlah hna,” tiah Khayan Channel nih a langhter. Cu mawṭaw aa cit mi hna cu SAC ralkap 9 hrawng an si lai, tiah zumh a si. the Chin Post
