Khah! Holhtuk Rih Hlah Usih, Zeitindah Kan Ral Kan Tei Khawh Lai Timi Tu Ruah Deuh Hna Usih. Meithal Thatha Tam Taktak Si Ko Hi

Khah holhtuk rih tuahhlah uh ralteinak dingtu ah zeidah Kan herh na tuahkhawh mi tu raktuah ve cio ko uh, chim tam lo ding tampi tu tuah ding. Crd; Lal Siammawi

Relchap: Pu Zingcung le a tapeh rual nih aana an tingmi thlah than an sian ti lo ahcun pengtlang kar ral thawh um te kho. Pu Zingcung phu nih Nothankap an thawl i CNF aana an ting. Falam peng CNA ralkap vialte an lungfak caah an chuak dih, pengdang zong nih CNF/A cu Hakha le Tt peng hriamtlai phu a si’ tiah an ruah beh. Tedim le Falam peng ah cun CNA nih an rak thahmi an tam tuk caah Kawl ralkap tluk deng in CNA hi an tih i an huat. TT khuachung zong ah mi sawhsawh tam ngai an rak thah ve hna kha. Nothankap zong kha a paw ah an kah i a thi cang an ti hnu ah an kaltak tiah ka theih, a dik le dik lo cu ka fehter kho lo.

𝐌𝐀𝐇 𝐧𝐚𝐤𝐢𝐧 𝐙𝐢𝐧𝐠𝐜𝐮𝐧𝐠 𝐚𝐧 𝐭𝐢𝐡 𝐝𝐞𝐮𝐡 𝐝𝐚𝐰𝐡: Falam le Tedim peng ah cun ‘MAH maw na tih deuh or Pu Zingcung dah’ tiah hal hna sehlaw ‘Pu Zingcung ka tih deuh’ a timi an tampi lai.

𝐏𝐮𝐩𝐚 𝐫𝐨 𝐛𝐚𝐧g 𝐂𝐍𝐅 𝐤𝐡𝐢 𝐚𝐧𝐦𝐚𝐡 𝐭𝐚 𝐚𝐧 𝐫𝐮𝐚𝐡: CNF/A khi Chin miphun dihlak ta tiah an chim tawn ko nain hruaitu lutlai sinak belte cu Pu Zingcung(ZC) le a tapeh pawl nih pupa ro bantuk in an mah ta ah an ruah i tutiang an uk peng. Suu Kyi nih a tapeh U Win Myint le Htin Kyaw president a tuanter hna i amah nih biachahnak a tuah tawn bang, ZC zong nih a tapeh cheukhat cu zoh dawhnak caah a phung men thimnak tuah in CNF hotu rian a khinh tawn hna nain amah nih a control dih ko hna. CNA zong a tuan bal loin US a phanmi Salai Thlahei zong khi a tapeh a si caah GS a tuanter peng ko khi. ZC le a tapeh rual nih an duh in an mer khawhmi lawng khi CNF upa an tuan kho. Tuni tiang ah cun pengdang dang vialte nih an cohlan khawh ding tiang in CNF remh an i tim bal rih lo.

𝐂𝐍𝐅 𝐳𝐚𝐦𝐭𝐚𝐤 𝐢𝐧 𝐫𝐚𝐦𝐭𝐡𝐚 𝐩𝐞𝐦 𝐜𝐢𝐚 𝐚𝐧 𝐬𝐢 𝐤𝐨 𝐧𝐚𝐢𝐧: Pu ZC telh in CNF lutlai vialte khi duhdim tein vawleicung ramtha bik US le EU ah khua a sa cangmi lawngte an si. Ramtang um an lung a dong hnu ah ramtha ah an zam i asylum/refugee an sawk, CNF nih zulhphung fek rak ngei cang hna sehlaw uktu sinak cu chim lo, member sawhsawh hmanh ah telh awk a tha ti lo dingmi an si, nain an fimzer caah an zam hnu zong ah aana an tlaih than khawh peng rih.

𝐂𝐂 𝐮𝐩𝐚 𝐚𝐧 𝐥𝐨𝐫 𝐭𝐮𝐤: Ramdang ah Chinland Club upa tam deuh cu Khin Maung Yee nakin an lor deuh ve, mit an kem tuk caah atu lio CDF fund kawl piaktu hna le pengtlang upa hna he an i rem bak hna lo. CC chairman tuan khi pupa ro ah an ruah ve hoi, anmah peng nawlngei bik si an duh. An lungput ziaza an thlen ve a hau.

𝐋𝐚𝐮𝐭𝐮 𝐂𝐃𝐅 𝐧𝐢𝐡 𝐂𝐍𝐀 𝐫𝐚𝐥𝐛𝐚𝐰𝐢 𝐛𝐢𝐤 𝐚𝐧 𝐭𝐥𝐚𝐢𝐡: CNA ralkap vialte an lu bik a simi ralbawi pa cu Lautu ram ah zuu a ri i meithal a puah, Lautu CDF nih an tlaih i thong an thlak. Hibantuk siikan ngeilo CNA ralbawi an um pah tawn caah CDF pawl nih CNA cu 100% an zumh ngam lo khi a si ve.

𝐂𝐍𝐅 𝐧𝐢𝐡 𝐂𝐡𝐢𝐧 𝐡𝐫𝐢𝐚𝐦𝐭𝐥𝐚𝐢 𝐩𝐡𝐮 𝐯𝐢𝐚𝐥𝐭𝐞 𝐮𝐤 𝐝𝐢𝐡 𝐭𝐢𝐦𝐡: ‘One command’ tang ah Chin ralkap vialte um a herh timi an pemh dih caah CJDC timi hriamtlai phu komh an ser. CJDC tang ah cun CNF tluk in CNDF le CDF Mindat zong power an ngei ve cang. Nain, nikum thawk in CNF/A cu phaisa le meithal tam taktak an vun ngeih cang tikah ‘ziah kanmah pei kan ngan bik cang ko cu, kan fa thi he ai rual in nawl kan ngeih awk a si ti lo, kanmah nih kan uk dih hna a hau, kan thawng ngai cang i an kan ti ngam ti lai lo’ timi ruahnak thar an vun ngei.

𝐀𝐧 𝐜𝐨𝐧𝐭𝐫𝐨𝐥 𝐤𝐡𝐨 𝐥𝐨𝐦𝐢 𝐩𝐡𝐮 𝐭𝐡𝐞𝐧𝐜𝐡𝐞𝐮 𝐥𝐞 𝐤𝐚𝐡: CNF nih an zenh bikmi CNDF cu an target ngan bik a vun si. Zaniat le Hualngo kha an komh colh hna i anmah le anmah an sehter hna. Tedim peng ah cun ‘ZRA cu MAH tapeh an si’ timi propaganda an thlah hmasa i Zoland PDF te pawl hmang in an kah hna. Mindat CDF zong an i thenthek ngai, CNF nih virus a thlah ruang ah a si maw timi belte ka fehter kho lo. Mara le Senthang zong ah anmah le anmah an sehter khawh ngai hna.

𝐂𝐍𝐅 𝐮𝐤𝐧𝐚𝐤 𝐭𝐚𝐧𝐠 𝐚 𝐮𝐦 𝐝𝐮𝐡 𝐥𝐨𝐦𝐢 𝐩𝐡𝐮 𝐧𝐢𝐡 𝐀𝐀 𝐚𝐧 𝐩𝐚𝐧𝐡: Ne Win bang, tar tiang uknak thlah a siang ti lomi Pu ZC le a tapeh pawl nih uk than ding cu CNO/CNDF, Mara MDF, Mindat CDF le pengtlang CDF cheukhat nih an duh ve lo caah AA an panh. AA nih a bawmh theng hna lo i CNA nih ZRA bantuk in a kah sual hna ahcun vansan ah MAH lila bawmh an hal te khomi asi, DKBA bantuk in. Cu dirhmun phak cu tih a nung bak.

𝐌𝐢𝐩𝐡𝐮𝐧 𝐚 𝐝𝐚𝐦 𝐧𝐚𝐤 𝐡𝐧𝐠𝐚 𝐂𝐍𝐅 𝐧𝐢𝐡 𝐚 𝐭𝐮𝐚𝐡 𝐚 𝐡𝐚𝐮𝐦𝐢: Miphun nan dawt taktak ko ahcun ramtha ah a zam ciami vialte cu ‘𝐞𝐱𝐞𝐜𝐮𝐭𝐢𝐯𝐞 𝐫𝐢𝐚𝐧’ tlaih i tim ti hram hlah u, nanmah cu ruahnak petu rian lawng nan tlaih awk a si cang. Ramchung le ramri ah a cawl khomi mino hruaitu tha tampi kan ngei ko hna. Saya Kamlo(Hakha CDF) le Van Thawng Thang(CNDF) te pawl khi Myanmar president hmanh a tuan kho ding an si cang.

Cucaah, miphun a dam nan duh taktak ahcun CNA/F dictators vialte khi i din cang u(Than Shwe nakin aana nan ting caan a sau deuh cang hih). Peng kip CDF vialte sawm u law ai rual tein CNF/A ah power pe hna u. Asilole, zapi cohlan ciami CJDC kha fek tein thazaang thawnter than hram ko u— pengtlang kar ral a thawh nak hnga lo. By- Salai Lungthli Tum