Press "Enter" to skip to content

KhinOo pengchung in PDf 144 nih ram lemiphun caah nunnak an pek cang

SAC ralkap nih mithah lainawnnak a tuah ruangah KhinOo pengchung in civil mi nunnak a liam mi hna le PDF chungtel in nunnak a liam mi dihlak cu 144 an si cang, tiah nihin May 11, KhinOo PDF dirh kumkhat a tlin ni ah KhinOo PDF nih an thanh. SAC ralkap hna nih KhinOo pengchung i rallam an sial voi zakhat leng chung ah, civil mi le tualchung hriamtlai phu chungtel a thi mi hna lengah hliam tuarmi minung 101 an um i, tlaih a tongmi minung 100 an um, tiah KhinOo PDF nih an thanh.

SAC ralkap nih KhinOo pengchung khua 28 cu mei in an khangh i, an hrawh dih mi khua hi khua 12 an si. KhinOo pengchung ah inn an khangh mi dihlak cu inn 1291 a si i, inn 153 cu khangh loin an hrawhpiak hna. Cun, inn 3 cu an phihkhar/hrenh piak hna, tiah theih a si. Yinmapin Ah SAC Ralkap Nih PDF Pakhat An Thah Lengah Inn 6 An Khangh: Sagaing ramṭhen Yinmapin pengchung khua pakhat cu nihin May 11 zinglei ah SAC ralkap nih.

Luhhnawh in inn 6 an khangh, tiah Naga Ngyinawng (နဂါးညီနောင်) phu nih an chim. Monywa-Ayagyi-Kalaywah lampi ah bomb puahhnawh a tong mi SAC ralkap hna nih May 11, zinglei suimilam 10:30 ah Yinmapin peng Nibyutaw(နိဗ္ဗူတော) khua cu meithal le bomb puah bu in an luhhnawh hna, tiah Naga Ngyinawng phu in ṭuanvo ngeitu pakhat nih cun a chim. “SAC ralkal hna cu meithal le bomb thlah bu in khuachung ah an lut i.

Thingkung cung ah a kai mi ral vengtu Nibyutaw (နိဗ္ဗူတော) khua tualchung hriamtlai phu chungtel pakhat cu a ṭum manh hlan ah a lu ah SAC ralkap nih an kah i, a nunnak a liam,” tiah a chim. Cu hnu ah Nibyutaw (နိဗ္ဗူတော) khua inn 6 cu mei an khangh i, an kaltak. Tualchung hriamtlai Naga Ngyinawng (နဂါးညီနောင်) phu cu khuachung ah lutin mei kaang cu an hmih i, innkhat mei lawng an thah khawh caah inn 5 cu vutcaam ah a cang dih, tiah Naga Ngyinawng phu in ṭuanvo ngeitu nih cun a chim chap.

Sagaing ramṭhen, Buhtalin(ဘုတလင်)peng ah SAC ralkap nih nitin ngawt in rallam an sialnak ni 10 tluk a si cang i, PDF nih an rak kah ve lengmang hna caah PDF in minung 5 an nunnak a liam cang. May thlachung Buhtalin (ဘုတလင်) peng ah SAC ralkap cu hmunhnih in rallam an sial i, khua pathum ah mizapi inn hna cu meikhangh in an hrawhpiak hna. Tualchung hriamtlai phu hna he atu le tu ti tluk in an i kap. Buhtalin (ဘုတလင်) peng tualchung hriamtlai phu in ralkap 5 an nunnak a liam i, SAC ralkap lei 10 hrawng an thi ve, tiah khua mi nih an chim.

May thla thok in nihin May 11 tiang SAC ralkap pawl cu thazaang 100 lengmang he Buhtalin (ဘုတလင်) pengchung ah rallam an sial tawn. Gantit (ကံသစ်) khuachung mei an khangh ruang ah kum 78 tluk tar pakhat cu meikanghnak in a nunnak a liam. Cun, Oakphu(အုတ်ဖို) khuapawng Yawgi(ယောဂီ) sianginn ah a zaam mi minung 9 cu a ruang um lo in SAC ralkap nih an rak thah hna, tiah theih a si.The chin Post

Be First to Comment

Leave a Reply

Your email address will not be published.