Press "Enter" to skip to content

Khuapi Chung Ah Kahdohnak A Chuak Kho: CDF Mindat

Chin ramkulh, Mindat-Matupi karlak, Mindat-Kyaukthu(ကျောက် ထု) karlak ah ralhrang motor run hna cu CDF nih atu le tu lamtan in an kah hna bantuk in mizapi vengtu ralkap phu kip he i bawm in ralhrang a doh pengtu CDF Mindat nih ralhrang cu kan doh peng lai caah, a hnu deuh ah cun khuapi laaknak ding i kahdohnak tiang a chuak kho, tiah CDF Mindat chimnak nawlngeitu Ko Zaw Mang nih a chim. “Kahdohnak a ra thluahmah lai, hmaitonh kahnak a um chin lai, a hnu ah cun khuapi la ding i kahdohnak hna a um te kho,” tiah Ko Zaw Mang nih Yangon Khit Thit ah a chim.

Nihin chun hrawngah Kyaukthu chaklei ralhrang buk in Mindat khuapi pawngkam khuate hna cu hriamngan in an duhnak poh an kah caah Liluang (လီလောင်)khua cu hriamngan kuan 2 nih a tlak i minung umnak inn 2 a kaang. Mipi aa hliam mi cu an um lo, tiah theih a si. Yat khua zong ah hriamngan kuan a tla i a puak rih lo mi hriamngan kuan hna a um, tiah theih a si. Mipi a hliam mi an um lo. Matupi in a rak ṭum mi ralhrang motor hna nih meng 56 sakhan pawngkam i a um mi mipi inn hna cu mei in an khangh, tiah kan ruah. Cu sakhan pawng ah minung le meikhu kan hmuh hna, tiah khua mi hna nih an chim.

Atu tiang ah hin ralhrang mawtaw run hna cu CDF Mindat nih an kah lengmang hna. Hmunhma a naih mi CDF Matupi, CDF Kanpalet, Yaw PDF, Kyauk Thu PDF hna he pehtlaihnak ngei in ralhrang cu an dohṭi hna, tiah theih a si. Caan karlak chung cu hmunhma aa naih deuh mi CDF hna he kan i pehtlai. Kanmah Mindat he cun Matupi, Kanpalet, Yaw, Kyaukthu hna he kan i naih hna caah pehtlaih kan ngei i ralhrang kan dohṭi hna. CJDC bantuk in ramchung dihlak; Chin ramkulh chaklei he zong pehtlaihnak kan tuah kho dih rih lo. CJDC lei ah duhsah tein kar kan hlang pah i, a hnu ah cun a phi chuak te ko lai,” tiah Ko Zaw Mang nih a chim.

Chin ramkulh chung um CNA tel in mizapi vengtu ralkap hna he Chinland Joint Defense Committee (CJDC) cu 2021 kum September 30 ni ah dirh a rak si i CDF Mindat zong cu phu chung ah cun tel ve. Chin ramkulh, Mindat peng chung, CDF Mindat nih ven mi hmunhma chung ah sianginn 136 on a si i cauk le bawlpen hna a chambau ngai; mipi hna ca zong ah pumpak hman ding thilri tete le eidin hna a harsa ngai, tiah Ko Zaw Mang nih a chim. Khit Thit Media

Be First to Comment

Leave a Reply

Your email address will not be published.