Ku Kanh Le Ta Di Hmunhma Kahdohnak Ah Nawlngeihnak Latu SAC Ralhrang Ralkap Sinah Hriamnam Cheukhat Kan Laak Khawh Tiah MNDAA Nih Cathanh An Chuah!
Shan ramkulh Mu Pan (Ta Di) hmunhma chungah Ku Kanh hriamtlai phu MNDAA le nawlngeihnak latu SAC ralhrang ralkap karlak ah kahdohnak a chuak i, hriamnam cheukhat kan chuh/laak khawh tiah Ku Kanh hriamtlai phu MNDAA nih cathanh an chuah hi a si.
Ku Kanh hriamtlai phu MNDAA le nawlngeihnak latu SAC ralhrang ralkap cu January 23 ah khan Ku Kanh pengkomh le Mu Pan pengkomh chungah an i kap tiah theih a si.
Ku Kanh pengkomh Syin Wamh hmunhma Laing Huh Sih khua nitlaklei ah vawikhat, Mu Pan pengkomh Laing Gian ah vawikhat tiin kahdohnak a chuak.
Cu kahdohnak vawihnih ahcun MNDAA leikap ah a thimi le hliammi kan um lo pinah nawlngeihnak latu SAC ralhrang ralkap sinin i chawnhnak seh pakhat le Rifle meithal zuun khat kan laak khawh tiah cathanh an chuahmi ahcun an langhter chih.
Nawlngeihnak latu SAC ralhrang ralkap nih cun January 24 ah Tuluk ramri Ku Kanh Hmaw Htaih hmunhma chungah hriamngan hmangin an kah. Nawlngeihnak latu SAC ralhrang ralkap nih Mung Ku pengkomh chungah kahdohnak a chuah ruangah Ku Kanh Lung Kham, Hei Sing hmunhma in hriamngan lawngte hmangin MNDAA i Man Yan sakhan le Shih Gyu Ciah (ရှိကျိကျ) tlang cu an kah tiah cathanh an chuahmi ahcun an langhter.
Ref: People’s Spring
