Laimi Tampi Khua An Saknak Madalay Khuapi thli Le Ruah Nih a Den
Nizaan April 18, zaan ah Mandalay khuachung ah ruah a sur i, thli fak ngai in a hran caah Electric tung hna le inn cheukhat hna cu an rawk, tiah theih a si. Nizaan April 18, zaan suimilam 10:00 hrawng, ruah a sur hlan minutes 30 hrawng ah thlihrang nih thil a hrawh mi an um cang, tiah theih a si.
Thli a hran hnu ah zaan khuadei ruah a sur i, khuachung lam cheukhat ah ruahti aa dil. Mandalay nichuahlei Yemondaw(ရဲမွန်တော်) sangchung lampi ah nihin April 19 zinglei suimilam 11:00 luan tiang lampi cung ah ti aa dil, tiah theih a si. Ruah le thli a fah tuk caah Ayarwady tiva chung ah tilawng pahnih zong an pil, tiah theih a si. Cupinah Mandalay khuachung dihlak ngawt in mei a mit, tiah tualchung media nih an langhter.
SAC Ralkap Nih Kinmah Khua Hriamngan In An Kah I Inn 19 An Khangh!: Pauk peng Kinmah(ကင်မ) khua cu April 18 ah SAC ralkap nih hriamngan in an kah lengah inn 19 ciam dihlak in an khangh, tiah Pauk peng thlanglei Pyohcia hriamtlak phu nih an thanh. SAC ralkap nih Kyauk Oo(ကျောက်အိုး) khua an khangh hnu, an kir lei ah Kinmah khua chung ah lut in hriamngan an kah, tiah theih a si.
“Kyauk Oo khua in a kir mi ralkap hna nih April 18 chun Sml 12 luan tluk ah Kinmah khua cu hriamngan in an kah i khuachung ah an rak lut, inn 19 an khangh i a ciam dih. Khua mi 4 an tlaih hna i pahnih cu an kalpi hna,” tiah tualchung mi pakhat nih a chim. Cu SAC ralkap nih Pauk peng Kinmah khua an khangh hi a voi 3 nak a si cang i, inn 400 leng an ciam cang, tiah theih a si. The Chin Post
