Myanmar ram nawlneih nak latu ralkap nih cun, tuchun February 2 ah ramkulh le ramthen i a uk tu ding pawl an thim hna i Chin ramkulh hrang hruaitu thar dingah Pu Terrace San Mawi Nikhuai ( kum 65 ) an thim tiah thawng theih a si.
Pu Terrace San Mawi Nikhuai cu Chin ramkulh falam peng Lumte khuami a si i Dr.Nikhuai i a fapa a si. Dr.Nikhuai cu England ram ah sii lei i sianginn kai mi a si i cuhnu cun, Prime Minister U Nuh nih cun Yangon ah riantuan ding in an rak sawm nain, Falam sizung hrang ah i pumpe in kum saupi Falam sizung ah sibawi tuan mi a si.
Falam sizungpi i Dr.Nikhuai a tuan nak ruang ah, Falam sizungpi cu min a nei tuk i, Myanmar ram zong ah a lar tuk mi a si. Dr.Nikhuai i a fapa Chin ramkulh hruaitu thar Pu Terrace San Mawi Nikhuai cu tu dirhmun zong ah Chin ramkulh Supreme Court ah Judge a si. A riantuan pipawl nih cun, mifel bak a si nak kong zong an chim.
Ralkap nih an thim mi Chin ramkulh hruaitu thar Pu San Mawi Nikhuai nih cun Chin ramkulh CM hlun Pu Lian Luai i sinak a luah lai i kumkhat chung Chin ramkulh cu a hruai cang lai. A mah nih a hal mi ruang ah siloin, ralkap nih a fel an ti ruang ah an pek mi a si.( CW )
Be First to Comment