Loikaw Peng, Pakyael Ah Sualnak Ngei lo 2 Ralhrang Nih An Nung Bu In Meikhangh In An Thah Than Hna
Kayinni ramkulh, Loikaw(လွိုင်ကော်) peng Pakyael (ပါကျဲ) khuachung ah sualnak ngei lo khua mi minung 2 cu ralhrang phu kut in nizan February 10 ah mei khanghnak in thah an tong, tiah KNDF sin in theih a si. Loikaw-Demoso motor lampi ah a ummi Pakyael (ပါကျဲ) khua le
Mawchisuhsi khua pawng ah ralhrang phu hna le Kayinni ralkap phufonh kar kahdohnak a chuak i, ralhrang phu hna nih khuachung mipi umnak inn cu an khangh lengah sualnak ngeilo khuachung minung pahnih cu an tlaih hna i, ralhrang thilthuam an hrukter hna hnu ah, mei khangh in an thah hna, tiah KNDF nih cathanh an chuah.
“Meikhangh in thah a tong mi pahnih hna cu Pakyael (ပါကျဲ) khuami an si ti in theih a si i an min fehternak belte a um rih lo. Ralhrang pawl cu an umkalnak lamthluan ah inn khangh le hrawh lawngte an rian,” tiah KNDF phu chungtel in minung pakhat nih a chim.
Nizan February 10, zinglei suimilam 7:30 hrawng ah Pakyael(ပါကျဲ) khua le Mawchisuhsi (မော်ချီးစုစည်း) khuapawng i ralhrang umnak sakhan cu KNDF battalion 2, battalion 12, battalion 14 le KA phufonh nih an doh hna. Cu hnu ah chun suimilam 12 hrawng in Phatima(ဖားတိမာ) khua pawng ah kaphnih kar kahdohnak a chuak ṭhan tiah theih a si.
