Myanmar lamzawhnak ah nunnak can mi an tam tuk cang, March 3 i lamzawhnak ah minung 26 hrawng an thi. Ṭhenkhat cu hlunghlai ngai in an cawimawi hna i a thenkhat cu mipi theih mumal loin mual an rak liam. North Dagon 48 veng i a um mi tlangval pakhat zong North Okkalapa lamzawhnak ah avai telve i ralkap pawl nih a lu ah an rak kah ngah ruangah a thi. Chungkhar harsa tuk mi an si inn nulepa cawmtu a si, an rinhchanh tuk mi a fapa nih a thihtak ruangah a lungkuai tuk hringhran.
A nulepai min cu Ko Po Chit le Ma The Su an si, a pa nih siizung ah a fapa i ruak ava hlam i umpitu zong a nei loh. siizung lei in a thi cang tiin an catial mi cu ai ken i a fapa ruak pawng ah cun ngeihchia bu in a dir. Buaipitu zong nei loin a pa cu a mah te long ai chawk lengmang i a thilri zong ai thleng manh bal loh. ṭhenkhat media nih an komh nak ah a thilri te cu ai hruk lengmang i a fapa cu ‘Miralṭha a si’ a ti hnuah a hmanthlak cu a pom.
Ṭap ai tim loh nain a mithmai ah a lungzur nak cu hmuh khawh a si. Myanmar ramchung i a um mi Philippine milar Sinon Loresca nih a hmanthlak cu a post-piak i “Tuchun i thinlung kekkuaiter tu hmanthlak a si. Nitintein kan thinlung a kekkuai. Sualnak nei lo mi a fapa cu Myanmar ralkap/palik pawl nih an kah piak i a hmanthal te long a pom” tiin a facebook cahmai ah a langhter.
Cuti cun, a fapa i a thih nak konglam cu mipi nih an theih tik ah an tuarpi tuk cio. ṭhenkhat nih “An rethei ruangah maw miralṭha martyr tiin cawimawi nak zong a hlawh ve lo. Mi muiṭha, mi neinung fa lawng maw cawimawi nak a co ding an si. An zatein ram hrangi miralṭha martyr an si dih cio ko” titu zong an um.
Ramdang pawl zong nih a konglam cu an van theih dih cio i, Combodia mipi pawl nih “ngeihchia hlah uh kan ram bantuk nan si. Mipi zalennak cu kan phan hrimhrim lai ” an ti. Ko Po Chit te chungkhar cu mipi nih an ngeihven tuk cang hna i bomhnak zong pek an timh hna an phone number: 09673445616, anmah theitu pakhat i phone number: 09783816100. Credit : Biate Mizoram
Be First to Comment