Press "Enter" to skip to content

Mah Pa 2 Hi Min Aung Hlaing Caah Saltha Bak An Si

Myanmar ralhrangbu ngeihmi ral hriamnam serchuahnak sehzung (ကာကွယ်ရေး ပစ္စည်းထုတ်လုပ်ရေးစက်ရုံ – ကပစ) caah a herhmi thilri, seh le fimthiamnak vialte a damhkhan piaktu/a tawlrel piaktu cu STE Global Trading company ngeitu U Tun Hlaing a si. Kum 2010 khan ralhrangbu caah ramdang in ral hriamnam le a dang thilri tampi a luhpi tiah theih a si.

U Tun Hlaing hi Myanmar ralhrangbu hriamnam serchuahnak i hotu hlun a simi Lt. Gen. Thein Htay he naihniam tein aa kommi an si fawn. Lt. Gen. Thein Htay cu a rian in kumtling pensen a la cangmi a si ko nain ral hriamnam serchuahnak ah ruahnak petu ah an chiah peng rih.

Lt. Gen. Thein Htay cu North Korea in ral hriamnam cawk lo ding timi UN phunglam a buar tiin 2013 ah khan US nih dantat phihkharnak a rak tuah cangmi a si. November, 2008 ah Lt. Gen. Thein Htay cu General Thura Shwe Mann hruaimi palai hna he North Korea ah a rak kal ve.

U Tun Hlaing nih hin ralhrangbu caah hriamnam cawk-zuarnak a tuahtu dang hna bantukin raldohnak vanlawng le meithal phunphun hna pinah hriamnam serchuahnak i a herhmi thilri hna (ကုန်ကြမ်း) vialte luhpi (import) khawhnak nawl an pekmi a si.

A luancia February thla zarhnihnak ah khan Singapore ah a ummi U Tun Hlaing ngeihmi company Excellence Metal Casting Pte Ltd le STE Global Trading Pte Ltd nih ral hriamnam cawknak kongah Myanmar ralhrangbu le North Korea upa hna pehtlaihnak an tuah piak hna timi sualpuhnak ruangah Singapore palek nih U Tun Hlaing cu an tlaih ti thawng a rak leng. Asinain tha tein hlathlai a si hnuah U Tun Hlaing cu Rangoon ah a um ko ti theih a si ṭhan.

U Tun Hlaing cu ralhrangbu caah Russia ram in ral hriamnam a luhpitu mirum U Tay Za he zongin hawikom tha taktak an si. Anmah he naihniam tein a ummi hna nih U Tun Hlaing cu U Tay Za tluk dengmang in a rum ve tiah an chim.

Russia sermi MI-17 Helecopter, MiG-29 Jet Fighter le raldohnak vanlawng sernak ding ca i a hermi thilri tampi hna cu U Tay Za nih amah company Myanmar Avia Export hmangin Myanmar ralhrangbu caah a luhpi tawn tiah theih a si. Myanmar Avia Export cu MAPO tiah theihmi Russia’s Export Military Industrial Group ah Myanmar ram in palai umchun a si fawn.

February, 2020 ah U Tay Za fapa Ko Pyih Phyo Tay Za (Group Managing Director, HTOO Group of Companies) le U Tun Hlaing fanu Mah Thet Hnin Hlaing (Managing Director, Hong Bao Asia Co., Ltd) cu an i um. U Tun Hlaing cu Myanmar nakin Singapore ah a um deuh. Rangoon khuapi Pyi lam ah a ummi France rawldawr Water Library le Chinese rawldawr Hong Bao zong khi U Tun Hlaing chungkhar nih an onmi a si. Crd; The Chin Post

Be First to Comment

Leave a Reply

Your email address will not be published.