March 3-6 Upadates! Falam Lei In A Rak Kaimi Ralhrang Hna Cu CDF-Hakha Nih An Kahdoh Hna, 35 An Thi

Falam lei in a ra mi Council ralhraang le CDF-Hakha kar March 3-6 tiang Hakha peng chung i kahnak ah ralhraang 35 an thi, 18 hrawng hma an pu, CDF-Hakha in ralkap pakhat nih a nunnak a pek, ralhraang nih inn 18 an khangh, Chuncung khuami pakhat ralhraang nih an thah. March 9, 2022, CDF HAKHA.

FALAM LEI IN A RAMI RALHRANG HE I KAHNAK, March 9, 2022, Kawl Ralhrang he i kahnak; 1) March 03, 2022: Kalaymyo in Hakha lei ah a rak kaimi Kawl ralhrang hna cu Dokṭhet le Chuncung karah CDF Hakha nih bomb in kan kah hna caah ralhrang lei minung 8 an thi. CDF Hakha nih kan thlakmi video CDF file ah kan fim.

Kan bomb kahmi nih fak tukin a khen hna caah hmai an kal ngam ti lo i Dokṭhek ah an riak. Cu an riahnak ahcun ralhrang a thimi an hawi le kha an ruak an lak hna i inn chungah an chiah hna, cu hnu ahcun inn an khangh. Dokṭhek khuami inn an khanghpiak mi hna inn 16 a si.

2) March 03, 2022: Hakha lamruk tonnak Gate hngak Kawl ralhrang hna cu kah an si. Leng a rak chuakmi pakhat a thi. 3) March 04, 2022: CDF Hakha nih an hmailei in kan bawh hna. Raltuknak tank kha hmai ah an kalter i hriamngan in an kan kah. Kunfang a niam tuk caah kan duhning in kan kap kho hna lo.

4) March 05, 2022: Chuncung khua pawng ah mine chiahmi (voi 8 ) an i lamh caah ralhrang lei in minung 11 (11:00 AM) an thi. An kal ngam ti lo caah lam cungah hmunhma an khuar. Kan hriamnam ai dan tuk caah chunlai ah kap loin zanlei muih kan hngak. Zaanlei muih hram a van i thawk ah (7:00 PM) kan pel hna i kan kah hna, minung 10 an thi.

5) March 06, 2022: Chuncung le Hakha thar karlak ah kan kah ṭhan hna, ralhrang minung 3 an thi. Mine kan chiahmi (mine detecter an hman) an theih caah an kal ngam ti lo i Hakha rungtlang ummi (266) sinah bawmh an hal. Rungtlang lei in chanh dingah a rak rami cu Hakha thar an lonh ah kan kah hna. Minung 2 an thi.

Inn le Lo an khanghmi le hliamhma tuarmi; 6) Dokṭhek (March 03, 2022) khua i ralhrang an riah lio ah khuami inn 16 an khangh. 7) Hniarlawn thar an phak lio ah inn 2 an khangh, pastor pa inn pakhat aa tel. 8 ) Nu pakhat hliamhma a tuar.

Ram le Miphun Caah Nunnak Pemi; 9). March 05, 2022: Chunchung khua i ralhrang an riah lio ah Pu Rung Hu cu ralhrang kut in a nunnak a liam. 10) March 05, 2022: Kan ralkap chungin Van Ṭha Simoen (kum 21) nih ram le miphun caah a nunnak a pek. Source: Chinland Defense Force, Hakha (the hakha post)

Chaung-U peng Kangyikone khua ah Mah Bah Tah phungki Nandah Saryah hruaimi Pyo Saw Htee pawl kah an tong; 10 nak tlawm lo an thi. March 9, 2022, Sagaing ramthen, Chaung-U peng Kangyikone khua i Mah Bah Tah phungki Nandah Saryah hruaimi Pyo Saw Htee phu cu March 9 zaan suimilaam 12:00 hrawng ah PDF tangti phu 5 komh nih an kah hna i Pyo Saw Htee 10 nak tlawm lo an thi tiah မုံရွာအမြင့်လမ်း thawnfiang chimnak nawlngeitu pakhat nih Khit Thit Media ah a chim.

Cu Pyo Saw Htee phu hna cu tualchung PDF hna nih an kah hna lio ah, Kangyikone khua NLD tanhtu hna inn cu i khamnak ah an khangh i an zaam. An zaam lio ah Tualchung PDF phu hna nih an dawi hna i an kah hna ca ah 10 nak tlawm lo an thi tiah kan theih. Cu Pyo Saw Htee phu bawm ding in zinglei suimilaam 4:00 ah Monywa in council ralhraang pawl cu motor 3 in Kangyikone khua ah an rat ca ah PDF phu komh hna cu hnu an kir than tiah kan theih.

Council ralhraang motor a rak phanh in Pyo Saw Htee phu hna le ralhraang hna nih Yagyitaw, Waya khua le Sipagan khua cu zing in zaanlei suimilaam 1:30 tiang an hrawh i mei in an khangh dih hnu ah Kangyikone khua ah an kir than tiah မုံရွာ အမြင့်လမ်း thawngfiang thanhtu sin in kan theih. Source: Khit Thit Media