March 4 Kahdohnak Ah Ralhrang 90 Leng An Thi, PDF 8 An Nunnak Liam Ve
Yangon ramṭhen, Taithgyi (တိုက်ကြီး) peng, Bawdikung(ဗောဓိကုန်း) sang, Nga Einsuh(ငါးအိမ်စု) khua ah a kir mi PDF Mino 2 cu SAC ralhrang nih March 1 ah an kah hna i, an tlaih hna. Pakhat cu an kahnak hmun ah a nunnak a liam colh; pakhat cu rallam tarhnak ah an thah, tiah khua mi nih an chim.
Kah a tong mi PDF chung in pakhat cu a kee ah kuan nih a hliamh hnu ah SAC ralhrang phu nih bia halnak an tuah i, an thah beh, tiah theih a si. Yangon ramtṭhen, Dagon Myotit peng, Bahtu(ဗထူး) motor lampi March 3, zaan suimilam 10:00 hrawng ah mino pa 2 le nu 2 nih zulh mi motor cu SAC ralhrang phu hna nih an pah hna hnu ah motor cung cuang mi hna cu an tukvelh hna hnu ah an tlaih hna, tiah khua mi nih an chim.
Cu hnu ah civil thuam sawh he motor 3 an phan i Mino hna cu an tukvelh hna, meithal voi 2 an puah hnu ah mino hna cu an tlaih hna, tiah theih a si. Cun, Yangon ramṭhen Dagon Myotit peng no.44 sang ah um mi inn pakhat cu SAC ralhrang phu nih March 3, zaan suimilam 11:00 ah luhhnawh in pafa hna pahnih cu an tukvelh hna i an tlaih hna, tiah khua mi nih an chim.
Myanmar Ram Pumpi In Nikhat Chung Ah Ralhrang 94 An Thi: Myanmar ram pumpi in dohthlennak tuah hnu 2022 March 4 nikhat chung ah SAC ralhrang 94 an thi i PDF 8 an nunnak a liam, tiah Yangon Khat Thit nih cazin a laak ning in theih a si. Cazin ning ah SAC ralhrang lei a thi mi hi Magwe ramṭhen Gangaw ah 6,
Karenni Demoso ah 10, Sagaing ramṭhen Yinmapin/ Banboi ah 14, Paku ramṭhen Paku Yuma/Taungngo ah 15, Mandalay ramṭhen Mattara ah 12, Myaung ah 4, Saw ah 5 le Chin ramkulh Kanpalet ah 7, Falam ah 21 an dih lak 94 an si. PDF lei in Sagaing ramṭhen Depeyin ah 8 an nunnak a liam ve. Credit: The Chin Post
Rihkhuadar ah Ralhrang le Chin Ralkap Kahdohnak Thawng. Nihin March 5 zinglei sml 5:55 ah Chinland Falam peng, Rihkhuadar khua SAC Ralhrang Camp cu Chin Ralkap nih an va kah hna, tiah thawng kan theih.
Hi kahdohnak hi minutes 30 tluk a rau i, SAC Ralhrang lei in a tlawmbik minung 5 an thi i hliamtuar zong an tam. Chin Ralkap lei in hliamtuar an um nain thinphan awk a um lo, tiah theih a si. Nihin March 5, zing kahdohnak ah aa telmi Chin Ralkap hna cu CNA, CDF Hualngo, CNDF, PDF Zoland, CDM Siyin hna an si.
