Press "Enter" to skip to content

Min Aung Hlaing

Myanmar ram tuanbia ah a um bal rih lomi rammi vialte ralkap ṭuan dih ding timi upadi National Military Service Act cu ralhrangbu nih 2022 chungah tuah hrimhrim dingin an i tim tiah theih a si. Feb 2 i Naypyidaw ah tuahmi meeting ah ralhrangbu hotu Min Aung Hlaing nih “Runvennak lei hi kan ruah deuh a herh. National Military Service Act hi kan hmang bal rih lo.

Rammi vialte ralkap an ṭuan awk a si. National Military Act kan hman lonak a ruang cu ramchung hriamtlai buainak a um caah a si. Chawkhel rian ah kan ṭhawn lo ahcun tangka kan ngeih lo caah kan mithmai a bi. Ramkhel ah kan ṭhawn lo ahcun midang nih buainak an kan pek khawh fawn.

Runvennak le hriamnam lei kan ṭhawn lo ahcun king chuk king cho kan i huah hoi lai. Nehsawh zong kan tong lai. Kan hruangkulh a him lai lo. Hi hna pathum hi kan tuah hrimhrim dingmi an si. Tukum chungah a si khawh chungin tlamtlinh kan i zuam lai” tiah a chim.

National Military Service Act hi NLD cozah chan ah ralhrangbu nih an rak chuahpi cang nain President minthut a um lo caah a nung lo i nawlngeihnak lak hnuah atu bantukin nunter/fehter an i zuam ṭhan hi a si. Acting President U Myint Swe nih maw min a thut lai? Asiloah ralhrangbu hotu Min Aung Hlaing nih maw min a thut lai ti bel a fiang lo. Ref: The Chin Post

Ukraine ramri ah Russia nih ralkap thazaang a chap cuahmah lio ah NATO chungtel ram simi Europe nichuahlei ram venhimnak caah US nih ralkap 2,000 kan thlah chap lai, tiah February 2 ah a thanh ve. Hi a thlah mi ralkap thazaang tam deuh cu Poland ram ah an um lai i, Germany ram ah a um cia mi ralkap 1,000 zong Romania ram ah ṭhialter an si lai.

Nain Russia nih Ukraine a tuk tik ah Ukraine a bawmtu ding cu an si lai lo, tiah US ralkap bawizik nih a chim. “Hi ralkap pawl cu Ukraine a bawmtu ding an si lai lo, NATO ram pawl venhimnak thazaang fek deuh in sernak caah an si,” tiah US ralkap zung in biachimnak nawlngeitu John Kirby nih media hna sin ah a chim. Ralkap thazaang chap hi zungzal caah a si lo nain a herh ahcun kan thlah chap ṭhan ko hna lai.

How Russia Has Increased Its Military Buildup Around Ukraine - The New York  Times

A herh tik ah Europe lei ah kal colh ding in ralkap 8,500 cu ralring tein umter peng an si. A hlan i ralkap kan thlah tawn mi le tutan kan thlahmi hna hi an rianṭuan ding ai dang, tiah a chim chih fawn. Cun, Russia President Vladimir Putin nih Ukraine tuk ding ah biakhiahnak a tuah cang lai ti mi zong US nih cun kan zum lo, tiah John nih cun a chim chap. Russia nih Ukraine cung ah a tuahsermi thil sining zulh in US nih timhlamhnak zong ṭha tein kan ngei ve, tiah a chim chih. VOA

Be First to Comment

Leave a Reply

Your email address will not be published.