Min Aung Hlaing A Lung Dong Cang Caah A Hmunmi Remdaihnak Ceih Dingin Tlangcungmi A Sawm Hna
Myanmar ramchung ah Democracy le Federal hrambunh ramkomh ser khawhnak dingah a hmunmi remdaihnak kong ceihhmainak ah ralhrangbu nih tlangcungmi vialte a sawm hna tiah theih a si. Asinain anmah ralhrangbu nih ralhrang ah an chiahmi NUG, CRPH le PDF hna cu sawmmi ah an i tel lo.
Cambodia Prime Minister a rak tlawn lioah kaphnih hnatlak in cathanh an rak chuahmi chungah tukum ah kahdaihnak tuah ding timi aa tel, cu lawng si loin SAC chairman nih kumthar biacah a chimnak ah tukum chungah remdaihnak lamthluan thar kan thawk lai tiah a chim fawn.
A ra laimi Feb 12 ah ramkomh ni (Union Day) lawmhnak tuah a si lai i cu chungah cun a hmunmi remdaihnak kong ceihhmai chungnak zong an tuah chih lai tiah theih a si. Ralhrangbu nih nawlngeihnak an lak hnuin kahdaihnak hnatlaknak a rak tuah cangmi hriamtlaibu hna he biaruahnak cu a rawk i cheukhat hriamtlaibu he kahdohnak a chuak ṭhan fawn.
Dai tein lam a zawhmi hna cu ralhrang nih meithal in kahnak le thahnawnnak in an lehrulh hna hnuah mino tampi ramlak ah an zam i tualchung hriamtlaibu PDF/CDF an dirh cio. Cuticun an ngeihchun hriamnam hmangin ralhrang cu an doh caah ramchung hmunkip ah kahdohnak le bomb puahnak a chuak. A hlei in Kachin, Kaya, Kayin le Chin ramkulh ah siseh, Sagaing le Magwe ramṭhen ah siseh fak ngai in kahdohnak a chuak i ralhrang tampi an thi.
Ralhrangbu nih PDF cu ralhrang ah an chiah hna i anmah raldoh a chimtu tlangcung hriamtlaibu hna zong fak piin a mawhchiat hna. Source: VOA
