Min Aung Hlaing Caah Thawngtha Lo Tak A Si
Kachin state Phakan peng kahdohnak ah Kachin ralkap (KIA) nih ralhrang minung 200 renglo an thah hna tiah theih asi. February 3 thok in kaphnih kar kahdohnak a rak fak cang. February 5 ah ralhrang nih cunglei in kah hram an thok hna. Cun, bawmchantu zong an rak ra chap nain ralhrang lei a thi mi an tam taktak.
Nithum chung kahdohnak ah ralhrang lei athi mi hi 200 renglo an si. Ralhrang hi an dihlak tideng in an thi tiah theih asi. Kachin ralkap (KIA) lei zong hliamhma pu mi le athi mi an um ve nain zeizat ti afiang rihlo. Ralhrang athimi ruak cu Helicopter nih a rak lak hna tiah mithmu tunih achim. Ref; The Mindat Post
Yangon ramṭhen, North Oahkala peng, Shwepaukkan khua thar, North Dagon le Shwepyitha peng hna ah ti a chuahlonak nihnih a si cang i, Sang cheukhat ah cun nili hrawng ti a chuah ti lo caah mipi nih harnak tampi an tong lio, tiah theih a si. Ngaung Hna Pin ti peknak zungpi(Factory) ah mei a rawk i, ti dawpnak seh an on khawh lo ruangah a si i, seh hi an remh cuahmah lio a si, tiah theih a si.
“Cu hlan ah cun tilam a rawh i, a rat khawh lo ding ahcun zarhkhat hlan ah ti i khawn cia ding in thawng an kan thanh tawn. Atutan cu thawng thanhcianak zong a um lo. Thilsuk rian a ṭuan mi kan si i ti a rat lo ahcun harnak tamtuk kan tong,” tiah Shwepaukkan khua thar um mi thilsuknak dawr tuahtu pakhat nih a chim. Yangon ti peknak cu Juuphyo Dam le Hlawka Dam hi hman bik mi an si i ralhrang nih uknak an laak hnu in ti lam rawh le mei mih caan a tam i, mipi nih harnak tamtuk an tong, tiah theih a si.
Arakan( Rakhine) ramkulh, Maungdaw peng, Mietaih khua nichuahlei ah nihin February 6 ah Arakan Army( AA) le Ralhrang karlak kahdohnak a chuak ṭhan, tiah theih a si. Nihin February 6, chunhnu suimilam 3 in 4 kar ah voikhat, suimilam 4 hnu in zaan suimilam 6 tiang ah voikhat ti in voihnih bak kahdohnak a chuak i, an i kahnak zong hi hmunhnih ah a si, tiah min langhter duh lo mi tualchung mi pakhat nih a chim.
Kahdohnak a chuah ahhin hrimngan thawng zong thang ngai in theih a si i cheukhat tualchung mi hna cu lam naihnak khua hna ah an zaam hna, tiah theih a si. February 4 zong ahkhan hi hmun hrawng ahhin ralhrang le Arakan Army( AA) karlak suimilam pakhat chung kahdohnak a rak chuak i kaphnih thi an rak um, AA in security ralkap pakhat a nunnak liam i ralhrang lei a thimi belte official in thanh a si lo caah hngalh a si lo. The Chin Post
