Min Aung Hlaing Cu A Kuttang Riantuan Minung 100 Leng Nih An Chuah Tak Than Cang

Air Force Captain Moh Tung le SAC Ralkap Tiha Ning CDM An Tuah: SAC ralhrang kuttang rianṭuan an duh ti lo ruangah CDM tuah in mipi sin ah aa fonh mi air force ralkap minung 100 leng an si cang, tiah pyi-tuh-pan-tine phu sin in theih a si. February 22 ah captain Moh Tung(မုတ်သုံ), February 24 ah ralkap Tiha Naing (သီဟနိုင်) cu MA3 meithal zuun 2 he CDM an tuah i mipi sin ah an i fonh.

Atu ah cun a himnak hmun ah an phan cang, tiah theih a si. CDM a tuahtu air force captain Moh Tung le ralkap Tiha Naing cu a rauh hlan ah mipi sin ah theihternak kan tuah hna lai, tiah pyi-tuh-pan-tine phu nih an chim. Vanlawng in mipi bomb an thlak lio cu an zoh kho ti lo ruangah ralhrang lei in machine gun a tlaitu minung 100 leng nih CDM an tuah cang. Credit: The Chin Post

Puta Oo peng, Sumpion (ဆွမ်ပီယန်)khua, Lungsian(လုံရှာယန်) khua le Innsion (အင်စီယန်) khua kahdohnak ruangah mizapi cu ramlak ah an zaam i eidin, i dornak deu le muka hna ah an an i tingzo lo, tiah khua mi pakhat nih a chim. “Cungcih ding kan i zat lo caah a cheu cu muka kan cih i a cheu cu banhla hnah kan cih. Muka aa cih mi deu hi deu pa 4 hrawng lawng a si. Deu hi a zapi in deu 48 kan sak,” tiah khua mi pakhat nih a chim.

Dawr ngeitu hna zong Puta Oo khuapi, Myitkyina khuapi lei ah an zaam dih i eidin ti rawl le sii-ai hna va cawk ding ah an harsa tuk i bawmchantu zong an um lo, tiah theih a si. “Atu tiang i bawmhnak ka hmuh mi cu Datmei pakhat cio lawng a si. Kan chungkhat a ngei deuh nih a kan pek mi a si. Bawmhnak a kan petu dang, bawmchantu phu an um rih lo,” tiah khua mi pakhat nih cun a chim.

Puta Oo peng, Innsian ( အင်စီယန်) khua pawng Sing Gat Bom ( ရှိန်ဂတ်ဘွမ်) um SAC ralhrang hna le KIA ralkap hna karlak ah nizan tiang in kahdohnak a faak ngai i SAC ralhrang hna nih cungleizong in an kah pah hna. February thla thokka in kahdohnak hi a chuak i Puta Oo peng Sumpion, Lungsian, Innsion khua mipi hna minung 6000 leng an zaam cang i, a cheu cu Myitkyina khuapi le Puta Oo khuapi ah an zaam, a cheu cu ramlak ah an zaam, tiah theih a si.

Ralhrang Nih Okpho Khua Mi Hriamtlaiphu Minung 4 Mei In An Khaangh Hna!: Sagaing ramṭhen, YeOo peng Okpho(အုတ်ဖို) khua ah Okpho khua mi hriamtlai chungtel minung 4 an thah hna i mei in an khaangh hna, tiah YeOo pah-kah- phah phu(ရေဉီးပ-က-ဖ) sin in theih a si. Okpho khua ah ralhrang minung thazaang 80 tluk cu February 28 ah khan an lut.

March 1 zinglei ah ah hriam tlai phu hna nih SAC ralhrang hna cu bomb puah hnawh ding in an kal lio ah ralhrang nih an rak kah hna i minung 4 an thi, SAC ralhrang kut in a liam mi hna cu SAC ralhrang nih an khaangh hna, tiah YeOo pah-kah-phah phu sin in theih a si. A thi mi ralkap pawl an ruak cu ralhrang nih khua an chuah tak hnu lawng ah an lak khawh i an ruak cu an vui hna, tiah theih a si.

A thi mi ralkap pawl kong hi midang hminak ah thawng fianhternak tuah a si lo. SAC ralhrang phu pawl cu nihin zaanlei ah Taungkun(တောင်ဂွင်) khualei ah an kal, tiah theih a si. Nizaan zaan zong ah khan Okpho khua i ummi SAC ralhrang pawl cu mipi vengtu ralkap nih kutser meithal in an kah hna i hliam a tuar mi an um le um lo theih a si rih lo. Credit: The Chin Post