Min Aung Hlaing Cu ICC Ah Tazacuai A Si Khawh Nakhnga Minsen Tthutnak An Tuah Cang
SAC ralhrang ralkap Min Aung Hlaing cu ICC ah tazacuai a si khawh nakhnga minsen tthutnak cawlcanghnak an tuah.Hi bantuk cawlcanghnak Blood Money nih a hruai i, UNHCR nih SAC ralhrang ralkap nih an tuahserhmi kong he pehtlai in ca post zamhnak le hmurka in chimmi sawhsawhmi hna hi ngol in biatak tein dantatnak pe dingin atu bantukin an cawlcanghnak a si.
Minsen tthutnak cu a tlawmbik ah sing khat le cheu (150000) ngah dingin timhtuahnak an ngei i, March 15 zaan sml 12:00 hi a hnubik caan rikhiah a si. Blood Money nih minsen tthutnak sing khat le cheu a tlin ahcun UNHCR sinah nawlnak thil (4) he cakuat an tial te lai.
relchap..Shan ramkulh, Naung Cho( နောင်ချို) peng ah SAC ralkap hna le Chaklei PDF ralkap hna cu nizan March 13 le nihin march 14 ah pehzulh in an i kap i ralbawi pakhat tel in SAC ralkap 40 nak tam an thi, tiah a hmunhma thawnglatu hna nih Yangon khit thit ah an chim.
March ni 13 ah SAC ralkap Khah – Lah – Yiah 147 le No-509 Shan chaklei mizapi vengtu ralkap hna an i kap i, Khah – Lah – Yiah 147 ralbawi tel in SAC ralkap 25 an thi, tiah theih a si.
March 14 ah SAC ralkap Khah – Lah – Yiah 147, Brigade 99 le No-509 Shan chaklei mizapi vengtu ralkap hna cu an i kap ṭhan i SAC ralkap 15 an thi, tiah theih a si. Cu kahdohnak a can hnu ah SAC ralkap hna cu a thi mi le hliam an tam caah hnu an tolh hmasa i mizapi vengtu ralkap hna zong hnu an tolh ve, tiah theih a si.
KNU brigade 4 hmunhma Baik-Dawei pengkomh ah SAC ralkap phu hna le KNLA kar kahdohnak a chuak ṭhan i, SAC ralkap bawi pakhat lengah chungtel tampi an thi i, an hriamthil le phaisa zong an laak, tiah theih a si. MA meithal 4, pistol 1, RPG 1, hriamngan 2, Myanmar phaisa, Thailand phaisa le ralhriam thilri dangdang zong an laak, tiah theih a si.
Kayin ramkulh, KNU brigade 6 hmunhma Kawkareik-Kyain Seikgyi motor lampi i um mi Wizakung(ဝိဇ္ဇာကုန်း) khua ah khualtlawng mipi phaisa a haltu SAC ralkap kuttang riantuan Border Guard Force(BGF) chungtel 2 cu nihin March 14 zinglei 8:30 hrawng ah meithal kahnak in an thi, tiah khuachung thawngzamhnak nih an langhter.
KNU brigade 6 hmunhma Kyain Seikgyi (ကြာအင်းဆိပ်ကြီး) um mi khah-lah-yiah 32 battalion hmai ah nihin March 14 zinglei suimilam 9:00 in 9:30 tiang SAC ralkap le KNLA phufonh an i kap i, suimilam 10:00 hrawng ah Kyain Seikgyi (ကြာအင်းဆိပ်ကြီး), Mingalakung(မင်္ဂလာကုန်း) nitlak lei ah kahdohnak a chuak ṭhan. Cu kahdohnak ah cun khua mi minung pakhat a nunnak a liam i, pakhat nih hliam a tuar, tiah theih a si.crd the chin post
