Press "Enter" to skip to content

Min Aung Hlaing Cu Sunghnak He Ainai Chin Ko An Zam Thluahmah Ko Cang

SAC nih nawlngeihnak an lak hnuin AA he kahdohnak atu le atu a chuak i SAC ralkap sakhan tam ngai zong kan lak khawh pinah sakhan cheukhat zong lak dingin kan i timtuah, tiah AA nih nizan September 18 ah cathanh an chuah.

Rakhine ramkulh-Bangladesh ramri mengtung No.40 pawngah a ummi SAC ralkap sakhan cu thlakhat chung kan helhum hnuah August 31 ah kan lak khawh. September 10 lio zongah Khah Mah Yah 352 Battalion sakhan zong kan lak khawh, tiah an langhter.

Cu pinah SAC ralkap Thandaung sakhan zong thlathum chung kan helhum hnuah AA nih kan lak khawh. SAC ralkap ramri an sakhan pawl cu an chuah tak cang, tiah AA nih cathanh an chuah.

SAC ralkap an sakhan cheukhat zong AA nih phihkhamnak an tuah hna i, cu chungah India-Bangladesh-Myanmar ramri pawng ummi Meik sakhan zong aa tel, tiah theih a si. Rakhine ram chung le Paletwa hmunram ah umhmun khuarmi SAC ralkap pawl cu, kan kulh cang hna.

Cu kan kulhmi hna riahcaw chanhnak le a dangdang thilri chanhnak ding caah SAC ralkap nih an i zuam cuahmah. Vanlawng, le hriamngan in ni fatin an kan kah, tiah AA nih an langhter.

Nizan September 18 ah SAC ralkap Jet Fighter 3 in bomb le roket voi 11 an thlak. Pehtlaiin suimilam cheu chung an kah hnuah Helicopter 2 nih suimilam 1 chung hrawng an kan kah, tiah AA nih an langhter.

SAC ralkap nih Miwa(မီးဝ) sakhan in hriamngan in kah an bawmh hna caah cuka hmun cu AA nih hriamngan in kan kah ve hna. SAC ralkap nih hriamngan, vanlawng le ke in voi 7 an kan kah cang, tiah AA nih an thanh.

Kanbalu, Ayadaw, Khin-U hna ah kahdohnak a chuak i SAC ralkap 16 an thi, The Chinland Post | 2022 September 19 – Sagaing ramṭhen, Kanbalu peng le Thabeikkyin peng karlak Irrawaddy tiva in a rak raami SAC tinbaw 6 cu PDF phu 3 fonh nih an kah hna i SAC ralkap 8 an thi tiah theih a si.

September 7 ah Irrawaddy tiva zul in a kal mi SAC tinbaw 6 cu PDF phu 3 fonh nih an kah hna i SAC ralkap 8 an thi, 7 an i hliam tiah PDF chungtel U Aung Htet Soe Khiang nih Khit Thit ah a chim.

September 18 zinglei sml 10 hrawngah Sagaing ramṭhen, Ayadaw peng Yechin khuate pawngah ke in a kalmi SAC ralkap pawl cu dothlennak phufonh nih an kah hna i SAC ralkap 5 an thi, tampi an i hliam.

Ayadaw chaklei, Naunggyiai sakhaan in SAC ralkap pawl 40 hrawng cu ke in an kal i Kyapinhla, Kungtha, Watpit khuate hna tan in Yechin khuate pawng an phak lioah Ayadaw dothlennak phu pawl nih an kah hna i SAC ralkap tampi an i hliam tiah Ayadaw Post nih a rak langhter.

Cun September 16 chun sml 12:00pm hrawngah Sagaing ramṭhen, Khin-U khuapi chungah a um mi palek zung ah Pyusawhtee pawl training dihnak an tuah caah FUTURE HERO, Lighting, ARF le LPDF nih drone 2 in an kah hna i SAC ralkap le Pyusawhtee 3 an thi, 5 fak ngai in an i hliam tiah Khin-U peng PDF phu nih Khit Thit ah an chim.

China nih Taiwan a tuk a si ahcun, US Ralkap nih Taiwan kan bawmh lai tiah, US president Biden nih cun a chim tiah theih a si. Cu kong he pehtlai in China cu a thin a hung ngai lai tiah, ramkhel lei minung nih un an chim cio.

September 18, CBS media biaruahnak thlahmi pakhat ah China nih Taiwan ram hi a luhhnawh i a tuk ahcun, US nih cun a zoh sawh lai lo i Taiwan lei dirin kan bawmh hna lai tiah, Biden nih cun a chim hi a si.

Media biahalnak pakhat ah cun,”Ukraine kahdohnak zongah hriamnam lawng bawmh si loin ralkap thazang zongin maw na bawmh hna lai ti na chim duhnak a si” tiah an hal i “a si kho” tiah a leh fawn hna. The Chin Post

Be First to Comment

Leave a Reply

Your email address will not be published. Required fields are marked *