Press "Enter" to skip to content

Min Aung Hlaing hi Russia nih pekmi Covid raikhamsii le Booster dose zong ai chun ko cang nain

SAC Chairman Min Aung Hlaing cu Covid in a zawt caah mizapi hmaika ah a langh ti lo nak a si, tiah Zumhtlak a si mi Naypyidaw thawngpang chirhchan in Mizzima nih a ṭial. Febuary 27 ah Naypyidaw Detking Thiri peng puai pakhat a kal hnu in atu tiang mizapi sin in Min Aung Hlaing cu a tlau.

Mizapi hmaika in a tlau hlan deuh ah a tai a fak i cu hnu ah Covid in a zawt caah a inn ah Quarantine in an chiah i Office rian zong a ṭuan kho lo, tiah theih a si. Kum 65 upa cang mi SAC lutlai Min Aung Hlaing cu a tai a fah lengmang mi hi tai(tawkawng) cancer a ngeih caah si tiah biachokvai a chuak nain.

“Cancer ka ngei lo” tiah amah nih a chim i SAC zong nih Min Aung Hlaing ngandamnak kongkau thanh an duh lo, tiah theih asi. Min Aung Hlaing hi Russia nih pekmi Covid raikhamsii le Booster dose zong ai chun ko cang nain Covid an test i Positive a si ṭhiam.

Naypyidaw khuapi chung ah Omicron zawtnak a karh ngai i SAC chungtel upa cheukhat zong an i chawnh len, tiah theih a si. Interior Ministry i Duh- Vuanci le Palek Bawizik chang si mi Than Hlaing zong March 1-4 tiang kha Cambodia ram i tuahmi A Voi 40nak ASEAN Palek bawi pawl tonnak ah a va kal i, a positive ve caah Quarantine in an chiah ve, tiah theih a si. The Chin Post

CNA/CNF hmunhma chung ah a luancia February 27 in March 7 tiang Chin mizapi vengtu ralkap le SAC ralkap kar ah voi 18 tiang kahdohnak a chuak i, cu kahdohnak chung ah cun SAC ralkap lei in minung 80 leng an thi. Chin mizapi vengtu ralkap phu lei in minung 4 nih ram le miphun caah an nunnak an pek.

Chin ramkulh Falam in Hakha lei ah riahcaw phor in a kal mi SAC ralkap motor 27, tank 2 le minung thazaang 200 hrawng cu lampi ah voi 15 kah an si, hi chung ah hin SAC ralkap 70 hrawng an thi. Mizapi vengtu ralkap CNA in minung 3 le CNDF in minung pakhat tiin an dihlak minung 4 an nunnak a liam. Cu kahdohnak ah cun Chin ralkap CNA, CNDF le CDF-Hakha phufonh hna nih an kahdoh hna.

Cun, Chin ramkulh Falam peng no.2 India-Myanmar lampi ah cawlcanghnak a tuahtu SAC ralkap phu hna le CNA, mizapi vengtu ralkap phufonh kar kahdohnak a chuak i, cu kahdohnak ah cun SAC ralkap in minung 8 hrawng an thi. Mizapi vengtu ralkap phufonh lei hliamhma tuar an um lo. Cu kahdohnak ah cun.

Chin National Army(CNA), Chin National Defense Force (CNDF), People Defence Force- Zoland(PDF-Zoland), Civic Defense Militia (CDM-Siyin), CDF-Hualngoram phufonh hna an i tel, tiah Chin National Front nih cathanh an chuah.
The Chin Post _ Magwe ramṭhen, Pauk pemgkulh, Inngedawngh khua ah kum 42 nu pakhat cu SAC ralkap nih an tlaihhrem hnu ah an thah i, a sin ummi kum 3 ngakchia pakhat zong an thah pinah PDF 5 zong an thah hna, tiah theih a si.

March 5 ah khan SAC ralkap pawl cu khuachung ah an rak lut i zaam ai tim mi nu pakhat le a fanu cu an tlaih hna i a nu cu an tlaihhrem hnu ah an nufa in nam in an ah thah hna, tiah tualchung mi hna nih an chim. SAC ralkap nihcun PDF ralkap 5 zong an tlaih hna i mei in an khangh hna pinah nu le hngakchia tel in khuami 29 an tlaih hna, tiah Irrawady nih a langhter.

Muse Ah SAC kuttang Ralkap Hna Kah An Tong: Shan ramkulh chaklei Muse khuapi ah nihin March 8, zanlei sang ah SAC kuttang pyithuh ralkap cheukhat kah an tong i minung 2 an thi; minung 2 hliam an tuar, tiah theih a si. Muse khuapi chaklei veng, Taw Yaut( တော်ရွက်) ṭumnak lam ah a um mi mithi inn ah.

SAC kuttang pyitu ralkap hna cu an va phan i, ruak an vui lio; inn chung i minung 8 hrawng a ṭhut lio ah hriamtlaiphu pakhat nih an kah hna, tiah khua mi hna sin in theih a si. Kah a tongmi hna hi Muse SAC kuttang pyithu ralkap an si i, a kaptu hna i zei bantuk hriamtlai phu an si, theih an si rih lo.

Be First to Comment

Leave a Reply

Your email address will not be published.