Min Aung Hlaing Kuttang Hna
Kayin ramkulh, Myawaddy peng chung ah Nihin April 5 ah SAC ralkap le KNLA, KNDO, PDF a bawm mi hna karlak ah kahdohnak faak ngai a chuak i, SAC ralkap 40 hrawng an thih lengah 20 hrawng hliam an tuar, tiah theih a si.
Myawaddy khuapi um Woolay Myaing rilonh in SAC ralkap pawl cu an rak luh caah KNLA ralkap la an tanrualpi hna nih rak bawh in Maw Khe sakhan kalnak lam ah an rak kah hna, tiah theih a si. Kahdohnak a chuah lio ah Woo Lay Myaing ( ဝေါလေမွိုငျ ) SAC sakhan in hriamngan 120 mm in kah an bawmh hna, tiah KNLA nih an chim.
Cu bantuk in Thar Tone ( သထုံ) pengkomh in Phapon pengkomh SAC ralkap sakhan ah i thial ding in a kal mi SAC ralkap le BGF hna cu April 4 ah bomb puah an tong i minung 8 an thi. BGF a thi mi hna cu Myawaddy khuapi chaklei Swe Kok Kol ( ရွှေကုက္ကိုလ်) khuapi BGF ralkap thlanhmun ah vui an si, tiah theih a si.
Laykaegaw PDF Nih Sniper In SAC Ralkap 2 Nunnak An Lak: Nihin April 5, zinglei le zanlei ah Laykaegaw(လေးကေ့ကော်) pawng ah cawlcanghnak tuah in rallam a sialtu SAC ralkap hna cu PDF sniper tlaitu nih an kah hna caah SAC ralkap 2 an thi, tiah Cobra Column nih cathanh an chuah. Cobra Column lei hliamhma tuar um loin hnu an tolh kho ṭhan, tiah theih a si. TCP
Sagaing ramṭhen, KhinOo pengchung, ni 12 chung ah rallam a sialtu SAC ralkap 100 hrawng nih khua 25 an duahpiak hna tiah theih a si. March 24 thok in Sagaing ramṭhen Shwebo pengkomh KhinOo peng ah SAC ralkap 91 le pyusawthi 8 hna cu nihin April 5 tiang rallam hmunhnih ah sial in, khua 25 ah hriamngan an thlah. Cun, mizapi umnak inn cu meikhangh in an hrawhpiak hna, tiah theih a si.
Mizapi vengtu ralkap lei zong nih SAC ralkap hna cu March 29 ah voikhat, March 30 ah voikhat, April 1, April 4 le 5 ah bomb in an doh ve hna. Nihin April 5 zinglei ah rallam a sialtu SAC ralkap 99 chung ah 82 lawng an tang i, minung 17 cu bomb hliamhnak in an thi, tiah theih a si.
A luancia March 24 ah khan mizapi vengtu ralkap 2, March 31 ah mizapi vengtu ralkap 3 le khuachung civil mi 1, April 3 ah mino 3, an dihlak minung 9 cu SAC kut in an nunnak a liam, tiah theih a si.
SAC ralkap nih meikhangh in an hrawh mi inn hna cu March 31 ah Kalaloe(ကုလားလူး) khua in inn 52, Shalwin(ရှားလွင်) khua in inn 6, April 2 ah Minwan Saithkun(မင်းဝံစိုက်ကွင်း) khua inn 4, April 3 ah Ngatingyi(ငါးတင်းကြီး) khua inn 209, cu chung ah cun taih-inn 176; nihin April 5 zinglei ah Aungpin (အုန်းပင်) khua inn 6 le Saigawng(ဆိုင်ဂေါင်း) khua inn 3 cu meikhangh in an hrawhpiak rih hna. SAC ralkap nih ni 12 chung lawng ah inn 280 cu ciam dihlak in an khanghpiak hna.
KhinOo pengchung ah March 1 in nihin April 5 tiang ah minung umnak inn an khangh mi dihlak hi inn 646 a si cang i, sualnak ngei lo minung 3500 hrawng cu umnak ngei lo in khua an sa lio. Mipi 37,000 hrawng cu ralzam dirhmun an phan, tiah theih a si.
