Min Aung Hlaing Kuttang In A Chuakmi SAC Ralhrang Hna Caah Australia Visa Pek An Thok Cang

Mizapi uknak hramhram in a chuttu SAC chuahtak in mipi lei a ṭang mi ralkap poh cu Australia cozah nih ramchung luhnak visa pek a thok cang, tiah Melbourne hrambunh The Age thawngzamh nih a ṭial. SAC ralkap in a zaam i January thla chung ah Australia cozah nih ramchung luhnak visa a pek mi hna,

SAC ralkap hlun pahnih cu The Sydney Morning Herald thawngzamh le The Age thawngzamh hna nih Interview an tuah hna, Myanmar – Thailand ramri a vun lonh hlan ah SAC Dohtu ralkap phu sin ah a fon mi SAC ralkap hlun pakhat nihcun, “Ralkap nih Uknak laak hi ka cohlan khawh lo caah ka chuahnak a si,” tiah a chim.

“Kei cu mizapi ka that duh hna lo, ka that ngam fawn hna lo i Mizapi he ral i dir zong ka duh lo,” tiah ralbawi(captain) hlun pakhat nih a chim. Cun, a chungkhar he Australia a phan cang mi ralkap hlun dang pakhat zong nih atu tiang ṭhihphaih an ton peng kong a chim i, “SAC hi an sual kho tuk hranghran,

Kan ramchung ah kan um ngam lo, Uknak a laak hlan ah cun kan ram hi dai tein a um lai tiah kan rak ruah, asinain mizapi vanchiatnak ah uknak an laak diam,” tiah a chim chih. Hi ralkap pahnih hna hi SAC thiltuahmi an duh lo ruangah SAC a zaamtak mi an si i kan hnu January thla ah khan Australia cozah nih ramchung luhnak visa a pek mi hna an si. Credit; The Chin Post

Putin Cu Lainawngpa Tiah American President Joe Biden Nih A Auh! Russia President Putin cu lainawngpa tiin American President Joe Biden nih hmasabik ah a uah cang. March 16 ah thawngpang fianternak an tuahnak ahcun thawnglatu pakhat i biahalnak cu President Joe Biden nih a cunglei bantukin a lehmi a si i,

hi bantukin lainawngpa tiah a timi hi cohlan khawh le ngaihthiam khawhmi a si lo tiah Russia ram nawlngeitu chungin biachimnak nawlngeitu nih a leh ve. Ukraine sinah American nih a bawmh dingmi zongah: vanlawng kahnak dung gyi, drone telh in Laungchia tampi an tel i, zarh khat chungah American bawmhnak lawngah 1 billion a tling cang tiah President Biden nih a chim.

Cupinah Poland le Moldova ah Ukraine rammi ralzaam tamtuk an luh ruangah minung le minung i zawnruahnak le bawmhnak pek dingin biakamnak a tuah cang bangin eidin siseh, sii-aii telh in thil dang herhbaumi tete cu American cozah nih an timhtuah cuahmah lio a si. Crd: Voice of Myanmar

Ukraine Kahdohnak Ah Russia Ralkap Bawi Ngan (4) An Thi Cang! Ukraine ramchung kahdohnak ah Russia ralkap ralbawi ngan pakhat a thi chap tiah Ukraine President nih a chim. Russia ralkap ralbawi ngan a thimi i min cu a langhter lo nain Bogyoke Oleg Mityaev a si tiah Ukraine ramchung runvennak zungah ruahnak cheutu/petu nih a chim.

Russia ralkap ralbawi Bogyoke cu Mariupol khuapi pawng kahdohnak ah Ukraine Battalion kutin a thi tiah Ukraine ramchung thawngzamhnak nih an langhter. Amah hi Ukraine ralkap nih an thahmi Russia ralkap bogyoke (4) nak a si cang tiah theih a si.

Atu tiangah Ukraine ramchung kahdohnak ah hin Russia ralkap bogyoke (20) nih an hruai hna tiin dothlatnak tuahtu nih an chim caah Russia ralkap bogyoke then (5) ah then (1) cu Ukraine ralkap kutin an thi cang tinak a si. Ukraine ah Russia ralkap bawi nganngan pawl cu a bikin kah that dingin ngiathlaitu phu an thlahnak kong cu Ukraine President he naihniammi pakhat nih Wall Street Journey ah a chim. Crd: Voice of Myanmar