Min Aung Hlaing Kuttang Riantuan Minung 8 Hna Cu KNLA Nih A Nung An Tlaih Hna
KNLA nih SAC Ralhrang 8 Thi, Pakhat a Nung in an Tlaih. Kayin ramkulh, Myawaddy District chung i Mawkhi SAC ralhrang sakhaan cu KNLA nih March 21 an lak i ralhrang 8 an thi, pakhat a nung in an tlaih. [Burmese] ကရင်ပြည်နယ်၊ မြ၀တီခရိုင် မော်ခီးကျေးရွာ စကစစခန်းအား KNLA ပူးပေါင်းတပ်က မတ် ၂၁ ရက်နေ့က သိမ်းပိတ်ပြီး စကစ ၈ဦးသေဆုံးကာ တစ်ဦး အရှင်ဖမ်းမိသည်။ Credit; The Chin Journal
Relchap; Sagaing ramṭhen, Yee Oo peng thlanglei kap Segyi(ဆည်ကြီး) khua lei ah a rak lut mi SAC ralkap motor 2 cu March 21 zaanlei sang ah bomb puahhnawh an si i, SAC ralkap 30 an thi, tiah Yee Oo PDF nih thawng an thanh. Bomb puahhnawh ruangah a ke kek mi SAC motor a hnu lei kuang ah SAC ralkap pawl ruak hmuh a si, tiah an chim.
Kahdohnak hi Yee Oo PDF le Yee Oo pah-kah-phah hna i bawm in an tuah mi a si i, PDF lei hliamtuar um lo tein hnu an tolh kho ṭhan, tiah theih a si. Cubantuk ṭhiam cun Sagaing ramṭhen, Pale peng nichuahlei mengkhat tluk a hlatnak Innkung khua lam tonnak ah nihin March 22 zing Sml 11:30 hrawng ah SAC ralkap motor pakhat cu tualchung hriamtlai phu nih bomb an puah in an doh i, SAC ralkap 4 an thi, tiah theih a si.
Cu SAC ralkap hna cu Daungnet nesimachia pyohcia phu(ဒေါင်းနက်နယ်စည်းမခြားပြောက်ကြား) nih an doh hna i, SAC ralkap 4 an thih colh lengah midang 8 faak ngai in hliam an tuar, tiah theih a si. Alaycuun khua hi pyosawthi an tamnak khua a si i, SAC ralkap le pyosawthi an ṭih ruangah khua mi hna an zaamnak hi thla 5 hrawng a si cang. Eidin tirawl le fenheih ah harsa ngai in an um, tiah theih a si.
A Dang Relchap: Mon ramkulh, Kyaukthu peng, Mayan Chuang khua pawng ah March 21 zan Sml 11:00 hrawng ah KNLA phufonh hna le SAC ralkap karlak ah kahdohnak a chuak, tiah KNU Brigade 1 Taton pengkomh Chiarman Pado Saw Soe Myint nih DVB ah a chim. Cu kahdohnak cu Suimilam cheu chung hrawng a rau i SAC ralkap lei in minung 4 an thi i minung 2 hliam an tuar tiah Pado Saw Soe Myint nih a chim.
Cu pinah March 21 ni zan Sml 9 :00 hrawng zong ah KNLA le PDF phufonh nih Taton peng, Win Pah( ဝင်းပ) khua i SAC ralkap Brigade 44 kuttang Khah – Mah – Yiah 9 cu 40mm in an kah hna. Cu kahdohnak ah cun SAC ralkp lei ralbawi changtu pakhat hliam a tuar, tiah theih a si. KNU Brigade 1 zohkhenhnak hmunhma a si mi Kyaukthu peng ah KNLA a fonhmi phu le SAC ralkap karlak ah atu le tu kahdohnak a chuak tiah theih a si.
Nikhat Chungah SAC Ralkap 50 Leng An Thi Tiah NUG Nih Cathanh Chuah: Mizapi nih dothlennak an tuah chung ah March 21, 2021 nikhat chung lawng ah SAC ralkap 50 leng an thi, tiah NUG nih cathanh a chuah. Atu cathanh chung nakin a hmunhma ah a thi mi le hliamtuar mi an tam deuh kho i, nikhat chung kahdohnak ah hliam a tuar mi minung 9 an si, tiah an chim.
Nizan March 21 nikhat chung ah Magwe ramṭhen le Mandalay ramṭhen hna ah voikhat veve, Yangon ramṭhen ah voi 3, Sagaing ramṭhen ah voi 9 tiin khadihnak a chuak, tiah NUG nih an thanh. Cupinah Myanmar ram chung mipi vengtu lei thazaang a ṭhawng chin i a luancia February 7 in March 6 tiang, thlakhat chung ah SAC ralkap 2095 an thi, tiah NUG nih cathanh a chuah. NUG cozah nih D Day a thanh hnu raltukruk chungah cazin laak ning in thanh a si i hliam a tuarmi hna hi minung 637 an si, tiah a chim. The Chin Post
