Press "Enter" to skip to content

Min Aung Hlaing Kuttang Um Rallam Sialtu Phu Hna Cu PRA An Kah Hna, Thi Le Hliam An Tam

Magway ramṭhen Saetoetaya(စေတုတ္တရာ) peng Takagyin(သက္ကကျင်း) khua nitlaklei ah rallam a sialtu ralhrang phu hna cu January 24 chunhnu in lampi ah kahdoh an ton caah ralhrang chungtel minung 6 an thi i, minung 12 nih faak ngai in hliamhma an tuar.

Ralhrang phu hna cu hnu an tolh ṭhan, tiah People’s Revolution Alliance (PRA -Magway) in rianngeitu pakhat nih a chim. Hmunhma zohfel ding le checkhlatnak tuah ding in a kalmi ralhrang phu hna cu lampi ah bawh in kahdoh an ton caah kaphnih kar kahdohnak a chuah hi a si, tiah theih a si.

“Nizan January 24, ralhrang phu minung thazaang 70 hrawng cu bomb puahhnawh in doh an si, cu hnu ah kaphnih kar kahdohnak a chuak colh. Kuan bawm cheukhat zong kan lak khawh,” tiah People’s Revolution Alliance (PRA -Magway) in rianngeitu pakhat nih a chim.

Kaphnihkar kahdohnak a dih hnu zanlei ah ralhrang phu hna cu umhmun an khuarnak sakhan Takagyin (သက္ကကျင်း) khua lei ah hnu an tolh ṭhan. Mizapi vengtu ralkap PRA phu cu hliamhma tuar um lo tein hnu an tolh kho tiah theih a si. Credit; The Chin Post

Kayah pengkulh, Demosso peng chung ah mizapi ngandamnak lei zohkhenhnak ah Memosso-PDF nih khua pakhat ah “CANAAN” tiah min an pek mi Sii-inn cu January 24 ah an on. Cu Sii-inn in rianngeitu pakhat nih cun, “Kayah ramkulh chung ah ralhrang le mipi vengtu ralkap kar kahnak a faak tuk tawn hringhran. Cucaah mipi pawl khua ah um ngam loin an zaam dih hna i ngandamnak lei zohkhenhtu zong an um lo.

Mipi nih an herh mi ngamdamnak lei zohkhenh ding ah CANAAN sii-inn kan tuahnak hi a si,” tiah a chim. Kahdohnak a fah caah mipi singkhat hrawng nih an inn le lo an zamtak i, an ngandamnak ca ah harnak an ton caah tu bantuk in mipi vengtu ralkap tawlrelnak in sii-inn an tuah hi a si. “Ralhrang nih uknak an laak hnu ah sii-inn vialte an khar dih. Ralhrang le Mipi vengtu ralkap kar kahnak lawng a faak i ralhrang nih hriamngan hmang in mizapi inn an kah tawn caah mizapi dihlak kan zaam dih cang.

Ngandamnak zohkhenhtu zong kan ngei lo i, harnak kan ton lio caan ah atu bantuk in sii-inn an kan tuahpiak hi cu kan i lawm tuk hringhrin. Kan bochan tuk fawn hna,” tiah khua mi pakhat nih a chim. CANAAN sii-inn cu Demosso-PDF hruainak in CDM a tuah mi rianṭuantu, Siobawi, nurse le Siibawi a kai lio mi le khua mi dihlak i bawm in an tuah mi a si. Ref: TCP

Be First to Comment

Leave a Reply

Your email address will not be published.