Min Aung Hlaing Ralhrang Anmah Le Mah An I Kah
Mandalay ramṭhen Aungmaytasan(အောင်မြေသာစံ) peng no.5 palik sakhan cu nihin February 17 zinglei suimilam 10:15 ah bomb in doh an ton caah ralhrang phu chungtel minung pakhat cu a thih an zumh kong mizapi vengtu ralkap phu nih an chim. Nihin February 17, Mandalay Aungmaytasan (အောင်မြေသာစံ) no.5 palik sakhan bomb puahnak cu Yadanarbon Phoenix Guerilla Force le Dragon Warrior phufonh nih an tuahmi a si, tiah theih a si.
Cun, February 16, zanlei ah khan Sagaing ramṭhen Myaung(မြောင်) peng khuachung ah buainak a tuahtu ralhrang phu hna cu nizan zanlei ah anmah le mah i palh in, an i kah caah minung 3 an thi, tiah Myaung(မြောင်) peng mizapi vengtu phu le security phu- CDSOM nih cathanh an chuah. the chin post
Naypyidaw ah King Cawngtu Ralhrang Bomb In Doh An Tong: Nihin February 17, zinglei suimilam 6:45 ah Naypyidaw ralhrang phu hmunhma Pyinmana peng, Yeni hmai hlei gate i ralvengtu hna cu an umnak sakhan an kir ah Naypyidaw-PDF battalion 802, tat-khuai 5 nih bomb in an doh hna i, ralhrang 3 an thi, tiah theih a si.
Kahdohnak a dih hnu ah Naypyidaw-PDF hna cu hlawhtlinnak he an kir ṭhan kong thawng an thanh. Atulio cu Naypyidaw ah kahdohnak a chuak pah, tiah Naypyidaw PDF thawngthanhnak in theih a si. Yinmabin Meithatzung Bomb In Doh An Tong: Sagaing ramṭhen, Yinmabin(ယင်းမာပင်) pengchung ralhrang phu hna an luhchuahnak hmunhma Yinmabin (ယင်းမာပင်) meithatzung cu Saya San-PDF Special guerrilla phu nih February 15 ah khan luhhnawh in bomb an puah caah ralhrang minung 6 an thi i minung 2 nih hliamhma an tuar, tiah Saya San YMB-PDF nih cathanh an chuah.
Bomb in doh an tonnak hmunhma cu ralhrang phu nih umhmun an khuarnak a si lo, nain ralhrang phu nifatin an luhchuahnak hmun a si. Yinmabin (ယင်းမာပင်) pengkulh meithatzung cu February 14 zaan suimilam 8:00 ah an luhhnawh i, ralhrang phu an um lo caah cu meithatzung inn cung ah bomb lungkhat, inn tangah bomb lungkhat le a luhnak gate pawng ah lungkhat ti in an hmanh ta i, an chuahtak.
Zaan suimilam 9 hrawng bomb an hmanh mi lunghnih cu a puak i inn zong a rawk pah, tiah Saya San-PDF in chimphuannak nawlngeitu nih DVB ah a chim. February 15, zinglei suimilam 10:00 hrawng ralhrang phu hna nih meithatzung chekhlatnak tuah ding in an phanh ah,
zung luhnak pawng i bomb lungkhat cu a puak ṭhan i ralhrang minung 6 an thi i minung 2 nih hliamhma an tuar, tiah theih a si. Yinmabin(ယင်းမာပင်) meithatzung bomb in doh an tonnak kong ah ralhrang phu lei nih cathanh a chuah mi a um rih lo.
