Press "Enter" to skip to content

Min Aung Hlaing Ralkap Ceilak An Thah Hna, KDF Lei Hliam Le Thi An Um

Kaya(Karreni) ramkulh, Nanhmekhung peng Thazat khua kahdohnak ah ralhrang 20 leng an thi, tiah Karenni Democratic Front (KDF) nih a thanh. February 25 zing suimilam 10:00 thok in KDF, Loikaw PDF, DMOṭ-PDF, KNDF phu fonh le ralhrang karlak ah chunnitlak kahdohnak a chuak i ralhrang 20 leng an thi. KDF ralkap pakhat a nunnak liam i midang 3 hliamhma hmete an pu, tiah theih a si.

Nihin kahdohnak ah KDF ralkap a nunnak liammi Saw David @Law Aye cu upatnak kan pek, tiah KDF nih a langhter. Kaya(Karenni) ramkulh chung ah February 16 thok in ralhrang nih biatak tein rallam an rak sial i kahdohnak zong a fak ngai. Kahdohnak ah ralhrang a thi mi an tam caah SAC ralhrang nih vanlawng an hman tawn. Tutiang kahdohnak ah ralhrang 100 hrawng an thi cang i Mipi vengtu ralkap 30 hrawng nih an nunnak an pek cang, tiah theih a si. Credit: The Chin Post

Russia nih Ukraine a tuk nihnih hnu ah Russia President Vladimir Putin nih cun amah facebook ca hmai ah Ukraine a tuknak cu huatnak siloin remdaihnak an duh ruang ah a tuknak kong a ṭial. President Putin nih cun, “Bia i ruah in ceihkhannak ngeih kan duh ko. Minsk agreement bantuk in,

Ukraine cu Russia nih Cozah ah a cohlan mi Donbass Cozah kuttang ah i peknak caan ṭha kan pek. Ukraine nih a tuah ding mi cu a hraimnam kaltak in Donbass mizapi duh mi zulh lawng hi a si. Europe ram hna le US cozah he biaruahnak zong kan rak ngei cang nain anmah lak in kan hmuh mi cu – kan biahalnak zeirelpiak loin hnulei chit lawng a si.

“Kha kum le caan vialte ah khan Thlanglei ram hna nih Ukraine an dirhkamh i Russian he ral tho ding in an forh peng. Kum saupi chung cu kan ram innpa(Donbass ram) lak ah hriamthil a hman ca ah civil mi lak ah hriamthil hmang lo ding in kan rak nawl peng. Kan nawlnak cu hnulei chittak in kan ramri ah NATO hleipi an donh i Russia ram an kan kulh. Russia nih a tuah ve lo mi phihkharnak cu an hawikom ram hna nih an tuah fawn.” tiah a chim.

President Putin nih cun kum 2014 kum ah Ukraine in a rak laak cang mi Crimea kong a chim leng ah Cozah thar ah a cohlan mi Donbass ram ca ah ral an thawh lo kong a chim rih. “Crimea zong kan chuh mi hna siloin anmah duhthimnak tein kan sin ah a hung kir mi an si. Donbass Cozah ca zong ah ral kan tho lo; Ukraine ram ah civil war a chuak. Cozah fek ah Russia nih kan cohlan mi Donbass cu Ukraine nih a kah leng ah, vawleicung ram dang hna sin ah Nuclear ralthuam ngeih a duhnak kong a langhter, cucu Russia ṭhihphaihnak a si.

“Ukraine mizapi hna hi Russia mizapi hna he unau hrinkhat kan si nain an hruaitu pa le US nih ral ah an kan chuah; kanmah Russia huatnak thlaici an tuh. Kan unau Ukraine mizapi nih zalonnak an hmuh khawh nakhnga kan bawmh hna lai. Ukraine cu a zalong mi ram le amah tein a dirmi ram a si lai i, Russia hawikom ṭha a si lai. Ukraine cozah hi lentecelhnak bantuk men ah US nih ruat ti hlah sehlaw, kan ramri hin a ralkap vialte kirter hna seh, ti kan duh.

“Hi(Ukraine) tukdohnak ah kan duh bik mi cu Ukraine ram ah ralkap nawlngeihnak zorter in daihnak umter a si. Kan unau civil mi hna nih nan temtuar hrimhrim lai lo, ral thawhter ding siloin daihnak tuah ding in kan ra; sinain daihnak umter ding in le sualnak tlauter ding in thazaang kan chuah a hau,” tiah President Putin nih cun Ukraine a tukdohnak kong fianternak a tuah. Credit: The Chin Post

Be First to Comment

Leave a Reply

Your email address will not be published.