Press "Enter" to skip to content

Min Aung Hlaing Ralkap Hna Cu KNU Ralkap Nih Tampi An Thah Hna, Hliam An Tam Tuk

Karen National Union(KNU) brigade 5 hmunhma Mutraw pengkomh chung ah ralhrang phu le Myanmar Border Guard Forces(BGF) hna cu January 22 ah Karen National Liberation Army(KNLA) brigade 5 hna nih voi 6 tiang luhhnawh in an doh hna caah ralhrang lei in minung 8 an thi i, minung 7 nih hliamhma an tuar, tiah Mutraw thawngzamhnak nih a langhter.

KNU nih January 22 ah Nawwatha hmunhma BGF phu umnak lam gate lei ah voikhat, zinglei suimilam 6:30 ah Phapun nitlaklei ah voikhat, zinglei suimilam 10:05 ah ralhrang phu hna an umnak Tittapinkung (သစ်တပင်ကုန်း) ah voikhat ti in an doh hna i, cu dohnak ah cun ralhrang lei minung 4 an thi i minung 6 nih hliamhma an tuar, tiah theih a si.

January 22 zinglei suimilam 10:20 hrawng ah Loymoepalaw(လွယ်မူပလော) hmunhma Pasawphawloe(ပစော်ဖောလူ့) ah voikhat, suimilam 11:15 ah Thitakaloekung(ထီးတကလိုကုန်း) ah voikhat, suimilam 12:03 ah Wapalakhoe(ဝါးပလားခို) ah voikhat ti in KNLA nih an doh hna i ralhrang phu lei minung 4 an thi, minung 1 nih hliamhma a tuar, tiah Mutraw thawngzamhnak ah an langhter.

Ref; Khit Thit Media, The Chin Post

Relchap; Sagaing ramṭhen, Swebo peng ah nihin ralhrang le mizapi vengtu ralkap phu karlak ah kahdohnak a chuak. Ralhrang 10 an thi i Yua Soe( ရွာစိုး) khua cu ralhrang nih khua ning pi in mei an duah. Pum tlamtling lo tel in khua mi 2 ralhrang nih an kahthah hna tiah theih a si.

Sagaing ramṭhen, Swebo peng, Yua Soe (ရွာစိုး) khuachung ah ralhrang le PyoSawHtee a bawm mi phu thazaang 200 hrawng nih hriamngan in voi 5 hrawng an kah hna. Nihin January 24 , zinglei suimilam 8:00 hrawng ah khuachung lut in sualnak ngei lo minung 2 cu an tlaih hna i pum tlamtling lo tel in minung 2 an kahthah hna. Yua Soe khua cu an khua ning in an khangh caah khua mi hna cu an zaam dih, tiah theih a si.

“An hmuh mi pohpoh cu an tlaih hna; minung 70 hrawng an tlaih hna. Khuachung cu an luh in khua mi 2 an kahthah hnu ah khua cu mei in an khangh,” tiah khua mi pakhat nih a chim. “An thah mi pahnih hna min cu Ko Mg Ngeo (ကို‌မောငျညို)le Ko Nga Nua (ကို ငနှား) an si i, Ko Nga Nua(ကို ငနှား) cu pum tlamtling lo a si.

A dang an tlaih mi cheukhat hna cu ralhrang pawl nih khua ningpi in kan khangh lai, tiah an chimh dih hna hnu ah an thlah than hna,” tiah khua mi hna nih an chim rih. “Tlaih a tongmi hna cu ralhrang pawl nih nan khua hi mei in kan duah dih lai caah suimilam 1 chung ah nan herhmi i laak ulaw va zaam u, tiah an ti hna. Zei hmanh an la huaha manh lo. Cheukhat cu zei hmanh laak lo bak in a zaam mi hna zong an um,” tiah khua mi pakhat nih cun a chim.

Ralhrang pawl cu Yua Soe(ရွာစိုး) khua le Yee Pyo Kone(ရေဖြူကုန်း) khua karlak ah hmunhma an khuar i Yua Soe (ရွာစိုး)khua cu chunnitlak mei in an kangh. Yua Soe khua cu atu tiang in mei a dai lo i a kang peng rih ko, tiah a chim chap. Nihin January 24 zinglei ah ralhrang thazaang 150 leng, Swebo peng Thi Lung – Yee Pyo Kone khua lei in a chuak mi hna cu mizapi ralkap phu nih an kah hna caah ralhrang 10 an thi i ralhrang pawl nih Yua Soe khua cu an khangh tiah theih a si. Khit Thit Media

Be First to Comment

Leave a Reply

Your email address will not be published.