Min Aung Hlaing Ralkap Hna Cu Mipi Vengtu Ralkap Hna Nih Ceilak An Thah Than Hna
Council ralhraang hna cu Saw PDF le tangti phu hna nih an kah hna i 15 nak tlawm lo an thi, rammi nih pangpar he an don hna, March 10, 2022, Magwe ramthen, Saw peng ah Council ralhraang hna cu Saw Peng PDF le tangti phu hna nih March 8-9 ah an kah hna ca ah ralhraang 15 nak tlawm lo an thi i 10 nak tlawm lo hliamtuar an um tiah Saw PDF nih an thanh.
Council ralhraang 150 hrawng cu March 7 ah Saw in Kyuakhtu lei ah a rak chuak mi an si tiah kan theih. Teinak a hmu mi PDF hna cu tualchung mi hna nih Kahdohnak poh ah teinak hmu hna seh tiah an au i pangpar he an don hna, rawl an dangh hna tiah kan theih. Source: Khit Thit Media, the hakha post
Kayin ramkulh, Myawady chaklei Laykaegaw (လေးကေ့ကော်) kahdohnak ah SAC ralkap lei in minung 5 an thi i, minung 3 nih hliamhma an tuar, tiah mizapi vengtu ralkap chungtel pakhat nih a chim.
“Kanmah lei in hliamhma tuar le a thi mi cu kan um lo, anmah SAC ralkap lei in minung 5 an thi i, an ruak zong an char rih hna lo. Hliamhma tuar mi hna cu an char hna, an meithal le thilri cheukhat kan lak khawh,” tiah mizapi vengtu ralkap nih cun a chim.
Laykaegaw (လေးကေ့ကော်) hmunhma ah SAC ralkap hna hi KNLA, le mizapi vengtu ralkap PDF nih an kah hna, tiah theih a si. Mizapi vengtu ralkap phu chungtel pakhat zong nih, “A luancia March 6 ah khan PDF chungtel pakhat cu SAC ralkap hriamngan kahnak ruangah a kee a bul,” tiah a chim.
March 9 zanlei Sml 7:30 hrawng ah Bago( ပဲခူး) ramthen Woo( ဝေါ) peng , Palik sakhan hmai ah palikbawi pakhat cu Pistol in kahthah a tong, tiah Woo mizapi vengtu ralkap phu hna nih an thanh.
Cubantuk in March 7 zanlei Sml 6:30 hrawng ah Kachin ramkulh, Moe Moh ( မိုးမောက်) hmunhma chung ah cycle 3 a citmi palik 5 hna cu Banmaw- Moe Moh mawṭaw lampi i an kal lio ah meithal in kah an tong i, Palik Kyaw Ye Yah ( ကျော်ဇေယ) cu a thi.
Sagaing ramṭhen, Tangse peng, Kaan Thu Mah Palik sakhan um palik hna cu anmah hmanh mi bomb an i lamh i, a thi mi an um kho, tiah khua mi hna sin in theih a si. Kaan Thu Mah ( ကံထူးမ ) palik sakhan ah March 9 zanlei Sml 5 hrawngah,
Palik nih sakhan pawngkam thianhhlimhnak an tuah lio ah sakhan an kulhnak pawng ah an hmanh mi bomb cu an i lamh i faak ngai in bomb a puak. Cu puahkehnak ruang ah palik pakhat cu a khabe le a kut a ke hna ah hliam faak a tuar i sii-ai in an thlop, tiah theih a si. Credit: The Chin Post
