Min Aung Hlaing Ralkap Hna Cu PDF Phu Nih An Kahdoh Hna Thi An Tam, An Ruak Hmanh Lak Awk An Tha Lo
Sagaing ramṭhen, Yinmapin peng, Banhbuai khua le Tatkyukung khua karlak ah SAC ralhrang mawṭaw run pawl cu tualchung PDF phufonh pawl nih nihin March 4 zing ah bomb lung 30 hrawng an puahhnawh hna, tiah theih a si. Banhbuai khua le Tatkyukung khua karlak ah SAC ralhrang pawl nih hriamngan puah thlorh in an puah lio ah ‘Regional Friend Fighters-RFF’ pawl nih zing sml 9:41 ah bomb lung 30 in an puahhnawh hna i 10 cu a hmun ah an thi colh, tiah RFF nih a thanh.
Bomb puahhnawh ruangah SAC ralhrang cheukhat cu an ruak ai ṭhenṭhek dih i laak awk zong an ṭha hna lo, a thi mi ralhrang ruak pawl cu songkhoi ah an rawn hna i mawṭaw 2 in an kalpi hna. Tutan bomb dohnak hi Regional Friend Fighters- RFF Myaihoh Pyuhkya Force le Moetoh Kyay Force i bawm in kan puah hnawh mi a si, tiah RFF nih a thanh. Credit: The Chin Post
February thla chung ah Thailand ram ah rian ṭuan ding in phung ning loin a lut mi Myanmar minung 5000 leng an um, tiah Myanmar mipi kong ah a cawlcang mi committee President U Moe Gyo(ဉီးမိုးကြိုး) nih Delta New Agency ah a chim. Myanmar mi hna hi Thailand le Kayin ramkulh ramri Mon ramkulh le Taningtari ramṭhen ramri lunak deuh in an lut, tiah a chim chap.
Thailand-Myanmar ramri Mya Soh(မဲဆောက်) pengkulh chung ah Myanmar ram mi 200,000 leng le Thai mi 80,000 dengmang an um, tiah theih a si. Thailand ram ah phung ning lo in a lut mi pawl le a dangdang ruangah tlaih a tong mi pawl cu Thailand cozah nih zarhkhat ah ni 3 in anmah le an umnak cio ah an kuat hna. Nikhat ah minung 200 tluk in zarhkhat ah minung 600 tluk cu an umnak ah an kuat cang hna, tiah theih a si.
Ral Tuknak Chung Ah Hrenmi kum 78 Tluk Tar Nu Pakhat Cu KNDF Nih An Chanhchuah: Kayinni ramkulh, Nanmekhung (နန်းမယ်ခုံ), Dawbukhu(ဒေါဘူးခို) khua ah raltuknak a chuah caah cuka khuachung um mi kum 78 tluk tarnu pakhat cu chuak kho loin khuachung ah hren a si. Khuachung ah hren in a ummi kum 78 tluk tarnu nih cun, “Tlikzaamnak hmunhma ka ngei lo, tliknak vawlei a um lo, tlikzaamnak ding caah phaisa zong ka ngeilo,” tiah amah bawm ding in a sin ah a phan mi KNDF-BO1 ralkap hna sin ah cun a chim.
Khuachung ah hren in a ummi upa pakhat cu Kayinni mizapi vengtu ralkap KNDF-BO1 phu nih a himnak hmunhma ah an kalpi, tiah theih a si. Kayinni ramkulh chung hmunhma kip ngawt ah ralhrang phu hna le mizapi vengtu ralkap phu kar kahdohnak a fah caah a himnak hmunhma zong a um lo ti tluk a si cang.
SAC ralhrang phu hna nih cun mizapi an i dornak hmunhma hna cu vanlei in an kah hna caah khua mi nih harnak an tong. Cu chung ah cun kum upa cang mi le ngakchia zong an um caah an harnak a zual, tiah theih a si. Kayinni ramkulh chung ah February 16 in nihin March 3 tiang kaphnih kar kahdohnak faak ngai in a chuak, tiah theih a si. Credit: The Chin Post
