Min Aung Hlaing Ralkap Hna Cu PDF-Saw Nih An Kah Hna, SAC Thi Le Hliam An Tam Taktak
March 7 ah Saw khuapi in Kyaukthu lei a kal mi SAC ralkap hna cu Saw- PDF nih March 8 le 9 ah an rak kah hna i, SAC ralkap lei in minung 15 an thi i 10 nak tam hliam an tuar, tiah PDF-Saw sin in theih a si. SAC ralkap thazaang 150 hrawng cu raldoh ding in an ra i lampi ah a riak. Bomb kan hmanh mi cu SAC ralkap hna nih an i lamh i a puak.
Saw khuapi le Lay Gyi Eih ( လယ်ကြီးအိုင့်) khua karlak ah March ni 8 chun thok in hmaitonh kahdohnak a chuak i, Kaan Chuang ( ကန်ချောင်း ) phanh hlan tiang kahdohnak ah SAC ralkap lei in minung 10 an thi. Kaan Chuang( ကံချောင်း) le Kyaukthu (ေကျာက်ထု) karlak zong ah March thla 9 ah kahdohnak faak a chuak ṭhan i, SAC ralkap lei in minung 6 nak tlawm lo an thi; minung 10 nak tam hliam an tuar, tiah theih a si.
Kahdohnak chung ah SAC ralkap lei nih hriamngan le hriamhme he an duhnak poh an kah len nain PDF-Saw lei in aa hliam mi le a thi mi an um lo, tiah theih a si. Magwe ramṭhen le Chin ramkulh ramri ah March ni 9 ah khan Kanpalet CDF le The Youth Force ( Saw / Kyaukthu ) phufonh hna le SAC ralkap hna kahdohnak a chuak i,
SAC ralkap lei in minung 5 an thi; minung 9 hliam an tuar, tiah theih a si. Sagaing ramṭhen, Wattlat ( ဝက်လက်) peng zong ah Wattlat PDF le SAC ralkap karlak kahdohnak a chuak i, SAC ralkap 3 an thi, tiah Wattlat PDF Battalion 2 nih nihin March 11 ah cathanh an chuah. Credit: The Chin Post
Yangon ramthen, South Dagon ( ေတာင်ဒဂံု) peng, Myo Oo Kyiang Teih pawng ( မြို့ဦးေကျာင်းတိုက် ) um CNG Gas dawr ah nihin March 11 zingka ah CNG Gas dawr motor run cu thilphor motor pakhat nih a pah hna i minung 4 an thi, tiah theih a si. Thilphor motor a khaltu pa cu a ngu i, motor speed a ven khawh lo caah CNG motor run artlang in a dir mi hna cu a pah hna, tiah a pawng um mi hna nih a chim. Motor pahsualnak ruangah hin minung 4 an nunnak a liam i hliam a tuar mi zong an um, tiah theih a si.
