Min Aung Hlaing Ralkap Hna Nih An Hawi Ruak Lak An I Zuam
Ralhrang nih an hawi le February 7, 2022 i a thi mi hna ruak cu, lak an i zuam . February 8, 2022, Nanhya khua i lam cu an ruak lak an i tim hna lio ah an phih tiah a pawng um mi nih an chim. A thi mi chung ah captian 4 ranked a si mi an i tel chih.
A thimi hi 200 leng an si lai tiah Kachin ram nih an chim. KIA le PDF hriamngan le hriamnam zeimawzet cu an chuh hna. Ralhrang nih Nanyha khua bomb an thlak ruang ah Upa pahnih an thi, mipi kum 84 tel in pa 4 an i hliam. Nili chung Kachin ram i kahdohnak a fah hnu ah KIA in pa 1 le PDF in pa 1 ralkap an nunnak a liam tiah theih asi. 21 the chin time
Karenni (Kayah) ramkulh chung ah, ral ruangah a himnak hmun i ai dor mi ralzaam hna camp ah Demosoe peng CDM Fire Police pawl nih dinti an va pekṭhenh hna, tiah theih a si. Demosoe khuapi pawng ah a um mi ralzaam camp 4 hna ah Febuary 5 thawk in ti an van pek hna. “Ral ruangah ai dor mi an si caah duhdim in hman ding ti an ngei kho lo, Khuapi chung ti ah le mei a rat lo caah ti dawpnak seh hman khawh si lo, Cucaah ti an har tuk hna.
Cucaah dawtnak le zawnruahnak lungthin he kan pek chanhmi hna a si, zei bantuk cozah hmanh nih fial mi le man phalh in kan tuah mi si lo,” tiah CDM Fire Police nih cathanh a chuah. Ralhrang nih hriamngan an kah ruang le mizapi umnak hmun i kahdohnak a chuah lengmang caah Karenni(Kaya) ramkulh chung ah ralzaam an tam tuk i dinti an har tuk, tiah CDM Fire Police nihcun a thanh chih.
Kachin ramkulh , Potao peng, Lungsianyan le Suanpian khua pawng ah KIA & PDF le ralhrang karlak ah February 4 in nizan tiang kahdohnak a chuah caah tualchungmi 6000 tluk a himnak hmun ah an zaam cangnak kong Lungsianyan khua mi pakhat nih a chim. Nizan zong chunnitlak ti awk in kahdohnak a chuak, tiah a chim.
Lungsianyan khua hi Potao in meng 10 tluk a hlatnak ah a um i, minung 5000 hrawng an um; cu chung ah 4000 tluk cu a himnak hmun ah an zaam cang, tiah a chim. Febuary 1 ah, KIA & PDF nih Potao peng, Suanpian khua ralhrang camp cu an laak i,
Febuary 3 ah ralhrang nih vanlawng le hriamngan he a kah hna caah Suanpian khua mi minung 5 hliam an tuar i inn tlawmpal zong a kaang. Humhimnak ah an zaam hna i, Cu an zaamnak ah cun a ngandam lo mi kum upa pakhat a nunnak liam, tiah theih a si. Cu hmun ah cun ral ruangah ai dor mi minung 6000 hrawng an um lio, tiah theih a si. the chin post
