Press "Enter" to skip to content

Min Aung Hlaing Ralkap Hna Nih Khua Mi Hna Le PDF Minung Tam Taktak Zohchia In An Thah Hna

Sagaing ramṭhen, Shwebo pengkomh KhinOo peng, Theintaw (သိမ်တော်) khua nizaan March 8, chunhnu ah SAC ralkap hna cu khuachung ah lut in PDF chungtel 11 le khau mi 3 cu an tlaih hna hnu ah an thah hna. SAC ralkap nih an thah mi hna miruak cu khualeng ah an hlonh hna, tiah khua mi nih Yangon Khit Thit Media ah an chim.

SAC ralkap phu hna cu nizaan March 8, zinglei suimilam 10:00 hrawng in Theintaw (သိမ်တော်) khuapawng ah rallam an sial. Gyunlae(ကျွန်းလည်) khua mi minung 3 cu an tlaih hna i, ralphaw ah an hman hna. Theintaw (သိမ်တော်) khuachung ah hriamngan voi 50 leng an kah hnu ah khuachung ah an luhhnawh hna, tiah theih a si.

SAC ralkap hna khuachung an luh hnu ah ralphaw ah an tlaih mi minung 3 hna le mizapi vengtu ralkap chungtel minung 11 an tlaih mi hna cu Theintaw (သိမ်တော်) khuapawng hmunrawn pakhat ah an thah hna, tiah khua mi nih cun an chim. Cu SAC ralkap phu hna cu rallam an sialnak ah Theintaw (သိမ်တော်) khuapawng ah bomb in doh an tong i, cu kahdohnak ah cun SAC ralkap pakhat a thi.

A thi mi SAC ralkap cu khuachung ah a ruak an khangh, cu kahdohnak ah cun SAC ralkap lei hliam tuar zong an um, tiah theih a si. Cu SAC ralkap phu hna nih cun Tatpae(သက်ပေး) khua cu an luhhnawh ṭhan i mizapi umnak inn cu an khanghpiak hna. Nihin March 9 ah Muta(မူးသာ) khua cu an luhhnawh ṭhan i chekhlatnak tuah in thilri an hrawhpiak hna, tiah khua mi nih an chim. Credit: The Chin Post

Raltuk duhlonak lamzawh a chuah hnu in Russia ram khualipi Moscow khuapi chung ah ai choklet mi mipi hna cu palek nih an kham hna i, an phone cakuat le hmanthlak an chek tiah Moscow um mi Journalist pakhat nih a ṭial.

Kommersant thawngzamh Journalist Anya Vasileva nihcun Moscow khuapi chung Lubyanka pawng ah a um mi Detskiy Mir ti mi tunu(toys) zuarnak dawr pawng ah palek pawl nih aa choklet mi mizapi hna cu an dirter hna i an phone an chek lio hna video cu amah Telegram ah a tar i Social media dang ah a share tu an karh.

Phone chek a duh lo mi pohpoh cuka hmun cun kal an sianh hna lo, tiah Vasuleva nihcun a chim. Russia ramchung ah thawngdeu (fake news) a thanhtu poh cu kum 15 chung thongthlak khawhnak phunghram(upadi) thar kan hnu zarh ah khan Russia Congress nih a ser.

Russia le Ukraine Foreign Minister Turkey Ah An I Tong Lai: Russia Foreign minister Sergey Lavrov le Ukraine Foreign minister Dmytro Kuleba hna cu Turkey ram ah tonnak an ngei lai, tiah Turkey Foreign Mimistry nih fehternak he a chim.

February 24 in Russia nih Ukraine a tuk thok in a voikhatnak bik ramhnih Foreign Minister hna tonnak an ngeih a si lai. Turkey ram i tuah ding mi Vawleicung Foreign Minister Forum ah Russia Foreign minister cu a kai ve lai i, cuka ahcun Ukraine Foreign minister he zong a dang tein tonnak ngei ding in timhtuah a si, tiah Russia Foreign ministry in biachimnak nawlngeitu Maria Zakharova nih March 9 zing ah a chim, tiah Russia thawngzamh RIA Novosti nih a langhter.

Tutan Foreign Minister Forum ah Turkey Foreign Minister Mevlut Cavusoglu nih Russia- Ukraine Foreign Minister hna he anmah pathum lawng ton ding in a tawlrelmi a si. Russia le Ukraine tuknak daihter ding kong ah Kaphnih in palai an thlah mi hna cu tonnak an ngei lengmang ko nain a fekfuan mi biakhiahnak ngaingai an chuahpi kho rih lo. Credit: The Chin Post

Be First to Comment

Leave a Reply

Your email address will not be published.