Min Aung Hlaing Ralkap Hna Nih Khua Mi Mei In An Khangh Hna

Sagaing ramṭhen, Kantbaloe (ကန့်ဘလူ) peng, Yuatit(ရွာသစ်) khua cu SAC ralkap nih March 24 ah hriamngan puah bu in khuachung ah an rak lut i, khua mi 5 cu meikhangh in an thah hna. Nu le ngakchia telh in khua mi minung 80 hrawng cu an tlaih hna i, an hrem hna lengah an ngeih mi thilmansung hna cu motor in an i kalpi, tiah khua mi nih an chim.

“SAC ralkap nih khuachung cu ralkap thazaang 300 hrawng he zinglei suimilam 5:00 ah an kulh. Hriamngan voihnih an kah i, khuachung mipi cu an zaam hna caah SAC ralkap nih an tlaih hna. SAC ralkap nih an tlaih mi hna chung ah hin a tam deuh cu Nu an si. Khua mi minung 5 cu ‘hriamtlai nan si’ ti in, meikhangh in an thah hna.

Meikhangh in thah a tong mi hna cu an ruak ruh le mei vap lawng hmuh a si caah mizei dah an si fiang tein theih an si rih lo. Tlaih a tong mi nu pawl zong vawlei ah bawhter in fung in an tuk hna,” tiah khua mi pakhat nih a chim. Cun, pa cheukhat hna cu an phei ah thir cengceh (ပလက်ယာ) in an merhpiak hna i, an hnakhaw cu nam in an hlehpiak hna.

Khuachung inn 40 hrawng cu an inntung an haupiak fawn hna, tiah khua mi hna sin in theih a si. “Innchung ah lut in khua mi hna phaisa ngeih mi dihlak an lakpiak hna i, Phaisa lengah SAC ralkap nih an laak mi hna cu refrigerator, ti dawpnak seh, cycle le thil manngei deuh pawl an si.

Khuachung ah ni 3 chung umhmun an khuar hnu ah khua mi nih an nganh mi thilri dihlak cu motor in an thiar,” tiah khua mi nih cun an chim. SAC ralkap hna cu Yuatit(ရွာသစ်) khua in March 26 ah an chuak i, Yuatit (ရွာသစ်) nichuahlei khua, Tayatta(သရက်သာ) khua phung-ki pahnih zong an tlaih hna, tiah theih a si. Credit; The Chin Post

Yangon ramthen, Thanlyin peng ah ummi zinaan chuannak industry(Thanlyin) ah riantuan CDMer chungkhar 120 leng cu a tlai bik April 8 ah nan umnak inn in nan chuak dih lai tiah ca an pek hna tiah CDM a tuah mi pakhat sin in theih a si. ”Tamdeuh cu an tih i an zaam cang hna. A um rih mi inn pawl cu ca an phawt hna,

An zaam taakmi inn pawl zong ah ca an taar, Chungkhar 39 cu inn an hlan khawh lo caah harnak an tong,” tiah CDMer pakathat sin in theih a si. Cu riantuantu (staffs) an umnak inn in an thawl mi hna cu chungkhar 120 leng, minung 500 tluk an si tiah CDMer pawl sin in theih a si.

Minkin Peng Ah Palik 2 Kah An Tong Pakhat A Thi. Sagaing ramthen, Minkin peng, Tuang Twin hmunhma ah March 26 zinglei Sml 7:00 hrawngah sakhan leng ah a chuakmi Palik 2 cu Minkin mizapi vengtu ralkap phu hna nih an kah hna i pakhat a thi tiah khuami hna nih a chim.

Cu palik 2 cu Minkin peng Tuang Twin hmunhma Monyua – Yargyi – Kalay Wah lam ah an kah i India lei kal nak lam pial pawngah um hmun a khuarmi SAC ralkap kuttang palik an si tiah theih a si. Palik 2 cu cycle pakhat in Myomah khua lei ah an kal tiah thawng kan theih i Minkin peng mizapi vengtu ralkap phu nih lamtantim in kan bawh hna i kan kah hna tiah Minkin PDF hruaitu pakhat nih a chim.