Press "Enter" to skip to content

Min Aung Hlaing Ralkap Minung 15 Hrawng PDF Nih An Kah Thah Hna

“Kani ram chung ah rallam sial in a rami ralhrang le Pyusawtthi pawl cu kan kah hna i minung 15 hrawng an thi” tiah Kani PDF Battalion -2 (KPDF-2) nih nihin February 21 zingka ah cathanh an chuah. Minkin peng, Taungdwin khua chaklei ah a um mi Sithlinchaung(စစ်လျင်ချောင်း) khua in Kani peng, Saeyua(ဆယ်ရွှာ) lei ah ke kal in rallam a sial mi ralhrang le Pyusawtthi phu minung 100 hrawng cu nizan February 20 zingka ah mipi vengtu ralkap phufonh nih an kah hna.

KPDF-2, TDPDF, Golden Triangle Brigade le Special Regional Attack Force-Monywa phu i bawm in bomb pali an puah hna pinah meithal in an kah hna i ralhrang le Pyusawtthi minung 15 hrawng an thi i hliamhma a pu mi an tam. Ralhrang pawl cu a thi mi le a hliam mi an tam caah an khuallam peh ti lo in an kir ṭhan i Tatchaung(တပ်ချောင်း) khua pawng ah an riak, tiah an cathanh ah an langhter. Mizapi vengtu ralkap phu lei in thi le hliam an um lo, tiah theih a si.

Russia le Belarus raltuk cawnṭinak cu nizan (February 20) ah khan a dih cang caah ngol ding in timhtuah a rak si nain pehzulh ṭhan in raltuk cawnnak kan tuah rih lai, tiah Russia President Putin le Belarus President Lukhashenko nih biakamnak an tuah ṭhan. Ukraine nichuahlei hmun ah thil sining a ciankuan lo caah Belarus ram ummi ralkap 30,000 tluk zong ka kirter rih hna lai lo, tiah Russia nih a thanh fawn caah Russia nih Ukraine a luhhnawh taktak ko cang lai hlah maw tiah vawlei pumpi an thin a phang.

Ukraine luhhnawh nak ding lam zong Moscow nih a kawl cuahmah lio a si, tiah Nitlaklei ram hna nih Russia an mawhchiat. American Foreign minister Antony Blinken nihcun, “Russia le Belarus raltuk cawnṭinak caan an sauh mi hi ralthawhnak tlangpar ah an dir timi a langhter,” tiah a chim ve. Russia President Putin le French president Emmanuel Macron cu nizaan, Febuary 20 ah phone in an i chawn i “Ukraine hi luhhnawh ka tim hrimhrim lo raltuk cawnnak a dih cun Belarus ram in ka ralkap an kir viar ko lai, tiah Putin nih a ka chimh,” tiah French President Macron nihcun a chim ve.

British Prime Minister Boris Johnson nihcun, “French president Macron biachim mi zoh tik ah Putin nih hin Ukraine he an buainak hi Palai ton biaruahnak in daihter a duhnak a langhter ko,” tiah a chim ve. Ukraine nichuahlei ah Russia nih a dirpi mi hriamtlai phu le Ukraine ralkap karlak i kahdohnak a chuak mi kong ah, “Ukraine ralkap tuahnak ruangah kahdohnak a chuak mi a si,” tiah Putin nih cun a chim. Credit; The Chin Post

Minmu Mipi Vengtu Ralkap Ummnak Sakhan Pakhat Kahdoh An Tong: Sagaing ramṭhen, Minmu(မြင်းမူ) pengchung mizapi vengtu ralkap umnak sakhan pakhat cu ralhrang phu hna nih nizan February 20 ah luhhnawh in an kah hna pinah nu 7 le midang 3 an tlaih hna, tiah theih a si.

Hi kahdohnak ah hin mizapi vengtu ralkap 2 an nunnak a liam i, minung 10 tlaih an tong, tiah Ministry of Defence, National Unity Government(NUG), nih an langhter. Sakhan chung thilri- kutser meithal a tawimi le a saumi 50 leng, kutser kuan le bomb leng ah Mipi ralakp sakhan zong an hrawh dih, tiah khuachung thawngzamhtu phu nih an chim.

Yinmarpin Lam Ah Ralhrang Mawtaw Bomb Puahhnawh An Tong: Sagaing ramṭhen, Yinmarpin peng chung ah thazaang 80 hrawng aa tel mi ralhrang motor 6 cu bomb puah an tong i a thi mi le a hliam mi an tam, tiah mizapi vengtu ralkap phu hna sin in theih a si.

Yinmarpin khua kalnak lam Innkyin Tuang( အင်ကြင်းတောင်) le Phurwin Tuang (ဖိုလ်ဝင်‌ေတာင်)pawngkam hrawng ah nizan February 20 zanlei Sml 2:00 hrawng ah ralhrang phu hna cu mizapi vengtu ralkap hna nih an bawh hna i bomb in an puah hna, ralhrang motor 3 an kaang, tiah theih a si.

Cu ralhrang motor run cu Yinmarpin Local PDF, Chintwin Galone Rayar Pohkyua ralkap phu, Monyua Truth Of Force ( MTOF ), Salinkyi Takutaw Tubah Rayar le Triple Two hna i bawm in Pepa bomb lung-3 le Ann Sa Tone bomb lung- 33 in an kah hna.

February 21 zinglei tiang ah ralhrang hna cu lam pawngkip ah ralvengtu i chia in an um, tiah theih a si. Triple Two phu nih cun mipi cu kahdohnak chuak kho a si caah an unkalnak ah i ralring ding in thawng an thanh hna. Crd: The Chin Post

Be First to Comment

Leave a Reply

Your email address will not be published.