Min Aung Hlaing Ralkap Minung Tam Tuk An Thi
Kachin ramkulh, Muhngin (မိုးညှင်း) lei ah Tank he rallam a sialtu ralhrang phu hna motor cu Hupin (ဟိုပင်) ah nihin chunhnu suimilam 1:00 hrawng ah KIA le PDF phufonh nih an doh. Hi kahdohnak ah hin ralhrang lei minung 10 nak tlawm lo an thi, tiah PDF nih cathanh an chuah.
“Ralhrang phu lei nih hriamngan le tank in an kah hna nain PDF le KIA in hliamtuar an um lo. “Ralhrang phu hna cu lampi hmunhnih i doh an tonnak ah a thi mi le hliamtuar an tam, lampi ah an thisen luannak hmuh a si, ralhrang lei a thimi hna an ruak cu motor in an thiar hna,” tiah PDF nih an cathanh chung ah cun an langhter.
KIA le PDF thawngzamhnak pakhat nih cun Hupin(ဟိုပင်) kalnak ah ralhrang phu hna motor cu kahdoh an ton caah ralhrang hna motor cu aa let i a thi mi ruak cu motor 3 nih a char hna, ralhrang phu chungtel 10 nak tlawm lo cu an thi i hliamhma tuar zong an tam, tiah an langhter. Khit Thit Media, the chin post
Myanmar ralhrang caah Russia serchuah mi raltuknak tank pawl cu Thilawa tilawng bual( သီလဝါဆိပ်ကမ်း) ah Russia nih a rak pekchanh, tiah “Myanmar Withness” nih Planet ( ဂြိုဟ် တု) in hman an thlak mi he January 26 ah cathanh an chuah.
Kan hnu December thla dih hrawng ahkhan Russia ram ”Vladivostok” tilawngbual ( Seihkaan) in “CAPTAIN YAKUBOVICH” ti mi tilawng cu a rak i thawh i January 24 zinglei ah Yangon Thilawa tilawngbual a phan. Raltuknak tank a phurh mi hna cu an ṭhumh hna, Tilawng nih a phurh mi raltuknak hriamnaam hna lak ah BRDM- 2M phun a si mi security latu tank pawl zong an i tel, tiah Myanmar Withness nihcun a phuan chih.
2019 kum Russia-Myanmar hriamnaam cawkzuarhnak hnatlaknak ah BRDM-2M raltuknak tank kong hi a rak i tel cang, tiah Myanmar Withness nih a thanh chih i February 1 ralkap nih uknak a laak hnu in NayPyiTaw khuapi chung ah ai chawk mi raltuknak tank pawl hi Russia serchuah mi BRDM-2M an si hna tiah theih asi. Myanmar Withness phu cu Myanmar ralhrang nih Minung covo a buar mi pawl kha khawmhsuat i International ah report a tuahtu phu pakhat an si.
Crd: The Chin Post
