Min Aung Hlaing Ralkap Nih Hriamngan In Mindat Peng Khua An Kah

Mindat peng Vuamtu (ဝမ္မသူး) khua cu ralhrang nih hriamngan in an kah hna caah mizapi cu a himnak hmun ah ṭhial an herh ti in nihin February 15 ah khua uktu nih cathanh an chuah. Rallam a sialtu ralhrang phu hna nih Mindat peng Vuamtu (ဝမ္မသူး) khua cu i tinh in, hriamngan in an kah hna i,

cuka khua he meng 18 tluk aa hlatnak Mindat khuachung um mi 274 battalion zong nih a langhlat kahnak hriamngan he an kahbawmh fawn hna, tiah theih a si. Nihin February 15, zinglei suimilam 10:00 hrawng ah ralhrang phu hna le CDF cu Vuamtu (ဝမ္မသူး) khuahlun Kyawng Nu thlang ah an i kap, tiah Mindat peng uknak hruaitu nih cathanh an chuah.

Vuamtu (ဝမ္မသူး) khua pawng hrawng ralzaam hna nih a himnak hmun ah i dor a herh kong zong Mindat peng uknak hruaitu nih an cathanh ah an langhter. Credit; The Chin Post

Magwe ramṭhen, Saw peng ah February 11 in 13 tiang, ni 3 chung a cat loin kahdohnak a chuak i, cu kahdohnak ah cun ralhrang 25 an thi i, 15 hliam an tuar, tiah Saw PDF in ṭuanvongeitu nih DVB ah a chim.

Saw ramṭhen, Kyaukthu in Saw lei ah a kal mi ralhrang motor 16, minung thazang 300 hrawng cu Saw PDF le Nginaung Mahamik(ညီနှောင်မဟာမိတ်) he February 11 in 13 tiang, ni 3 chung catlo in an i kap, tiah theih a si.

Ralhrang pawl hi Kyaukthu sakhan in Saw khuapi lei ah February 7 hrawng khan an rak chuak cang. February 10 ah Nginaung Mahamik YDF le Kyaukthu le CDF(Kanpalet) hna he i bawm in, bomb in an rak kah hna. Kah-Pa-Sa (ကပစ) 25 in a rak chuak mi ralhrang hna zong Saw PDF he an i kap i Saw khuapi ah kir ṭhan, tiah theih a si.

Kaphnih kahdohnak chung ah Nginaung Mahamik lei in hliamtuar le a thi mi um loin hnu an tolh ṭhan kho nain ralhrang pawl an kham khawh lo caah mipi sin ah ngaihthiamnak an hal i, an hriamnam aa thlau nakkong zong an langhter. Kaphnih kahdohnak he pehtlai in aa hliam mi le a thi mi kong ah ralhrang lei in cathanh an chuah mi kan hmu rih lo.

Mipi umnak Inn 39 a khangtu ralhrang motor run cu Tanhse peng ah February 14 ah bomb puah an tong i ralhrang 20 hrawng an thi, tiah theih a si. Ralhrang 100 leng an i telnak ralhrang motor run cu zanlei Sml 2:00 hrawng ah Moe Buang Htik Yua Si (mah) (မူးဘောင်ထိပ်ရွာရည်(မ)) khua pawng ah hriamtlai phunfonh nih bomb an puahhnawh hna, tiah min langhter a duh lo mi thawnglatu pakhat nih The 74 Media ah a chim.

Cu ralhrang hna lam cu January 11 ni ah Kaa Puang Kyiah khua ah an lut i umhmun an khuar caah bomb puah an rak tong bal i ralhrang 10 leng an rak thi, tiah thei a si. Nizan i ralhrang pawl bomb puah an tonnak cu Tanhse khuapi i KPK, TSR, Tawkyi MyatSaw le Local PDF hna i bawm in an tuah mi a si, tiah theih a si. Ralhrang hna nih nihin february 15, zing Sml 8:30 ah Chuang Sone khua le Pha Lan Chai khua mipi inn hna cu an khanhpiak hna, tiah theih a si.

Mandalay ramṭhen, Notogyi peng ah Cycle in aa chawk mi rahrang hna cu PDF nih an kah hna i ralhrang pahnih an nunnak a liam, tiah theih a si. Ralhrang an i cit mi cycle run cu Notogyi (PDF) nih lamtan in an kah caah kaphnih kahdohnak a chuak i ralhrang pahnih an kahdohnak ah an thi.

Midang pawl cu zaam nain cycle 4, luchin 2 le namtong 1 an laak, tiah Notogyi PDF nih tuzing February 15 ah an chim. Nihin zing sml 2:00 hrawng zong ah Taluk gas pipeline a hngaktu ralhrang hna umnak inn cu lamhlat kahnak hriam lung 2 in an kah hna i, a thi mi le aa hliam mi an um kho, tiah theih a si. Crd; The Chin Post