Press "Enter" to skip to content

Min Aung Hlaing Ralkap Nih Mipi Humhimtu Hriamthil An Chuh Hna

Nihin February 8, Yangon, South Okkalapa le North Dagon ah dohthlennak a tuahtu mipi vengtu ralkap nih hriamnam an chiahnak hmun 2 cu GPS hmang in ralhrang nih an laak. Ralhrang nih an tlaih mi mino pawl cu an hawi le he phone an chawnhter hna i, i tong ding in an chimhter hna nain ralhrang nih cun an tlai kho hna lo. Mino an tlaih mi hna cu hriamnam an pek hna i, an hawile sin ah an kirter hna.

Cu hriamnam ah cun GPS a thli tein an bunh i, cu GPS nih cun mipi vengtu ralkap hriamnam chiahnak hmun a chimh hna i, ralhrang nih fawi tein an hngalh khawh, tiah Yangon khua Dohthlennak tuahtu mi pakhat nih a chim. South Okkalapa hriamnam chiahna ralhrang nih an luhhnawhnak ah 40mm Bombs, Kutcheh bombs,

Meithal kuan pawl leng ah mino pakhat zong an tlaih, tiah theih a si. North Dagon i hriamnam chiahnak hmun an laknak kong cu fiang in theih a si rih lo. Dohthlennak a tuahtu mino dihlak zong ralring deuh in um a herh tiah, Yangon khua Dohthlennak tuahtu pakhat nih cun a chim chap. the chin post

Ralhrang nih an uk khawh ti lo mi Magway ramṭhen i Magway khualipi cu February 9 ah ralhrang bawizik Min Aung Hlaing nih tlawn aa tim, tiah theih a si. February 9 zanlei suimilam 1:00 ah department kip rianṭuantu he tonnak ngeih aa tim, tiah Magwe cozah rianṭuantu hna sin in theih a si.

Magwe, City Hall ah department kip hna rianṭuantu he February 9 chunhnu suimilam 1:00 ah tonnak a ngeih dih hnu ah Shwesetdaw (ရွှေစက်တော်) ah lanh aa tim, tiah theih a si. Magwe ramṭhen, Gangaw pengkulh chung ah a um mi Pauk peng le Myaing peng telh in, peng cheukhat cu PDF nih an uk cang hna i ralhrang nih hmun an ngei ti lo, tiah theih a si. The Chin Post

Karenni ramṭhen, Loikaw peng chung ah ralhrang le Karenni mizapi vengtu ralkap a bawm mi phu hna karlak ah February 4 le 7 karlak ah kahdohnak voi 3 a chuak i ralhrang 16 an thi, midang tampi hliam an tuar, tiah KNDF nih cathanh an chuah.

Loikaw peng, Kayan Tharyar(ကယန်းသာယာ) khua pawng ah February 4 zing Sml 5:30 ah a ra mi ralhrang phu cu Karenni ralkap KA le KNDF a fonhmi phu hna nih an doh i minute 30 hrawng kahdohnak faak ngai a chuak. Ralhrang lei in a thi mi an tam i a zat tu cu fiang in kan thei kho rih lo, tiah KNDF nih a chim.

February 4 zanlei Sml 2:10 ah Loikaw peng, Htee Yi(ထီရီ) khua tlang cung ah umhmun a khuar mi ralhrang phu cu Karenni a fonh mi phu hna nih an doh i kahdohnak Suimilam pakhat chung hrawng an j kap i ralhrang lei in 7 an thi, midang zeimawzat hliam an tuar, tiah theih a si.

Cu bantuk in Nizan February 7 ah, Loikaw peng, Lin Phung Lyin (လင်ဖုံလင်း) lam ah ralhrang phu hna cu KA, KNDF le Phekhung PDF nih nih an kah hna i ralhrang lei in 9 an thi, midang zeimawzat nih hliam an tuar. Cu kahdohnak voi 3 chung ah cun Karenni ralkap phufonh lei in ralkap cheukhat hliam an tuar ve. Sinain An hliam hma kong ah thinphan tuk ding a um lo, tiah KNDF nih nihin february 8 ah cathanh an chuah. The Chin Post

Chin ramchung kahdohnak ruangah India ram, Mizoram State ah zarhkhat chung ah minung 8,000 hrawng an zaam, tiah Chin Human Rights Organization (CHRO) Director Salai Za Uk Ling nih RFA ah a chim. Falam peng le Tedim peng ah Febuary zarhkhatnak ah khan tualchung hriamtlai CDF le rakhrang karlak kahdohnak a zual ngai caah atu bantuk in an zaam hi a si, tiah Salai Za Uk Ling nih cun a chim.

Atutan i Mizoram lei a zaam mi hna cu Falam peng le Tedim peng an si. Mizoram zaam mi ahcun Thantlang peng an tam bik i, tuan deuh ah khan Matupi lei zong an zaam ngai, tiah theih a si. Ralzam tam bik cu Thantlang, Falam, Tedim le Matupi peng hna hi an si, tiah a chim.

India lei zong nih zarhkhat chung ah Mizoram ah ralzaam 8000 tluk an phan tiah a thanh ve i, tuan ah Mizoram chung ah ralzaam 22,000 leng an rak um caah tutan 8000 he fonh cun 30,000 leng an phan cang. Cun, CHRO nihcun ramtang ah ai dormi rel cawk lo an um rih, tiah an chim fawn. Mizoram cozah nih cun ralzaam pawl cu Refugee ID Card tuahpiak a timh hna i atu hi cazin laak pah in Card zong an phawt pah colh hna, tiah theih a si.

Crd: The Chin Post

Be First to Comment

Leave a Reply

Your email address will not be published.