Press "Enter" to skip to content

Min Aung Hlaing Ralkap Tampi An Thi Tthan

Sagaing ramṭhen, Kani in Yelaykyone(ရေလယ်ကျွန်း) khua ah security congh thlen ah a kal mi SAC palek hna cu May 8 zing Sml 9 ah PDF nih rak bawh in an kah hna i, palek 5 an thi, tiah Kani People’s Defense Force-KLG ṭuanvo ngeitu nih a chim.

“SAC palik lei ci minung 30 fai an si, kahdohnak ah 5 an thih lengah hliam tuar zong an um. SAC lei nih hriamngan in an kan kah ve i, hriamngan kuan pawl zong kan pawngkam ah an tla. Kannih lei in kutser sniper le thalpaak in kan kah hna,” tiah Kani People’s Defense Force-KLG ṭuanvo ngeitu nih a chim. Sagaing ramṭhen chung ah Kani region hi PDF an ṭhawn i SAC ralkap tampi an thihnak hmun a si.

A luancia April 22 ah khan riancaw chanh ah a kal mi SAC ralkap hna cu DRPA le ṭangrual phu nih an rak kah hna i SAC ralkap pakhat a thi i, 4 hliam an tuar. Cun, April 6 ah khan KLG PDF sin ah CDM a tuah mi ralkap pakhat cu Thonggyi(ထုံးကြီး) khua kahdohnak ah SAC ralkap tlaih a rak tong i cu hnu tlawmpal ah an thah.

Kayin ramkulh, Pruso (ဖရူဆို) peng, Law Kyi Khu khua pawng ah SAC ralkap le Kayin mizapi ralkap vengtu phufonh hna karlak ah May 7 zinglei ah kahdohnak voihnih a chuak i, SAC ralkap 25 leng an thi, tiah KNDF Battalion 4 nih cathanh an chuah. Nizan May 7 zinglei Sml 8:30 ah Baw-La-Khe peng lei in a chuak mi SAC ralkap mawṭaw 20 cu Law Kyi Khu (လောကျေခူ) khua pawng ah KNDF nih an kahdoh hna i SAC ralkap mawtaw 4 a rawh lengah mawṭaw aa cit mi SAC ralkap dihlak minung 25 cu an thi. Cu mawṭaw a rawk mi pawl cu meikhangh in an hrawh chap, tiah theih a si.

Zinglei Sml 11:10 ah cu kahdohnak hmunah an hawile bawm ding in a ra mi SAC ralkap hna he kahdohnak a chuak ṭhan i SAC ralkap 10 a thi chap, a nung in 2 kan tlaih hna. Karenni ralkap lei in pakhat hliam a tuar, tiah KNDF Battalion 4 nih an thanh. SAC ralkap hna cu KA, KNDF Battalion 4 le Battalion 15 hna i bawm in an kah hna i, SAC ralkap sin in Machine Gun 1, RPG 1, MA 8 le hriamthil dangdang zong an laak, tiah theih a si.

Tanintharyi Peng Um SAC Ralkap Sakhan Pakhat PDF Nih An Luhhnawh: Tanintharyi ramṭhen, Tanintharyi peng um No. 4 Htung Kha (ထုံခါ) Thonginn sakhan cu Tanintharyi ramṭhen mizapi vengtu ralkap hna nih nihin May 8 zinglei Sml 5:00 hrawng ah luhhnawh in an kah hna caah SAC ralkap 3 an thi. Kahdohnak hi minutes 20 hrawng a rau i, SAC ralkap 3 a thi mi hna leng ah midang 3 zong hliam faak ngai an pu i, thi kho dirhmun ah an um, tiah Tanintharyi mizapi vengtu ralkap TDF nih cathanh an chuah.

Htung Kha ( ထုံခါ) thonginn sakhan luhhnawh kahdohnak ah hin mizapi vengtu ralkap lei in 1 a nunnak a liam ve. Htung Kha thonginn sakhan cu Yee Phyo SAC ralkap Camp he meng 3 hrawng a hlatnak hmun ah a um mi a si.

SAC Ralkap Zaw Phyo Cu YDF-Htilin Sin Ah CDM A Tuah: SAC ralkap ralkhamnak thilri sehzung pakhat in ralkap Zaw Phyo cu April 15 ah YDF-Htilin sin ah CDM a tuah, tiah YDF Htilin nih cathanh an chuah. SAC ralkap nih an tuah mi thil ṭha lo hna cu ka duh lo caah CDM ka tuahnak hi a si, tiah ralkap Zaw Phyo nih a chim.

SAC ralkap hriamnam tling( Full Equipment) he a rak i fonh mi hna cu phaisa sing 50 kan pek lai i, a himnak hmun ah kan chiah hna lai tiah YDF-Htilin in Swe Swun Ngun Battalion nih cathanh an chuah.

Relchap; KNU hmunhma Gawtulay (ကော်သူးလေ), April thlachung kahdohnak ah SAC ralkap le BGF 356 an thi, tiah KNU nih a thanh. KNLA, KNDO phufonh le SAC ralkap kuttang um BGF phufonh hna cu April thlachung ah voi 507 an i kap i, cu kahdohnak ah cun SAC ralkap lei in minung 350 leng an thi i minung 200 hrawng nih hliam an tuar, tiah theih a si.

Cu kahdohnak ah cun KNLA, KNDO phufonh in minung 15 an nunnak a liam i, minung 35 cu hliamhma an pu, tiah KNU nih an langhter. Kahdohnak voi 500 leng chung ah, voi 400 hrawng cu KNU brigade 5 hmunhma Phapun pengkomh ah a cang mi a si. KNU brigade 5 nih May 5 cathanh a chuah ning ah Phapun pengkomh April thlachung kahdohnak ah SAC ralkap lei tat-yin-hmu pakhat telh in Minung 173 an thi i, minung 90 hrawng hliam an tuar.

SAC ralkap nih nawlngeihnak an lak hnu in Kayin ramkulh um KNLA le SAC cu nifatin ngawt in an i kap i, thlakhat chung lawng hmanh ah kahdohnak voi za leng a chuak. Cu kahdohnak ah cun SAC ralkap nih vanlawng zong an hman, tiah theih a si. A luancia March thlachung zong ah Kayin ramkulh ah cun kahdohnak voi 510 a chuak, tiah KNU nih cathanh an chuah. KNU hmunhma Gawtulay (ကော်သူးလေ) kahdohnak ruangah tualchung mi singkhat leng cu ralzaam dirhmun an phan, tiah tualchung ralzaam bawmchantu hna nih an chim. Credit; The Chin Post

Be First to Comment

Leave a Reply

Your email address will not be published.