Press "Enter" to skip to content

Min Aung Hlaing Ralkap Umnak Hmun Cu Kareneni Ralkap Nih An Kah I, An Lak

Kayin ramkulh, Myawady peng Wawlay (ဝေါ်လေ) hmunhma SAC ralkap sakhan pakhat- Mawkhi (မော်ခီး) sakhan cu nihin March 21 zanlei ah KNLA nih an kah i, sakhan cu an lak khawh, tiah KNU thawngzamhnak nih a chim. “SAC ralkap sakhan hmasa pakhat a si i, kahdohnak chung ah SAC ralkap lei in minung 2 an thi. Cun, hriamngan 60mm pakhat zong kan laak khawh,” tiah KNU thawngzamhnak nih cun a thanh.

Myanmar-Thai ramri ah ummi Mawkhi (မော်ခီး) sakhan kahdohnak ah hin SAC ralkap chungtel cheukhat cu an nun buin tlaih an si, tiah Kayin thawngzamhnak nih cun a langhter. Cuka hmun cu KNU brigade 6 hmunhma a si. KNU brigade 6 hmunhma Kawkareit(ကော့ကရိတ်) ah SAC ralkap phu hna nih minung thazaang tampi he rallam an sial caah nitin ngawt in kahdohnak faak a chuak.

Kawkareit(ကော့ကရိတ်) kahdohnak ah kaphnih in a thi mi an um, tiah Kawkareik (ကော့ကရိတ်) khua mi pakhat nih a chim. Laykaegaw(လေးကေ့ကော်) Myotit telh in brigade 6 hmunhma ah umhmun a khuar mi SAC ralkap hna cu hnu tolh ding in le SAC kuttang rianṭuantu dihlak nih an rian ngoltak ding in KNU nih ralrinnak an pek hna, tiah theih a si. Credit; The Chin Post

The Chinland Post| 2022 March 18 — Senator Dean Smith le MP Vince Connelly khuakhan lairelnak le tawlrelnak thawng in Australia Prime Minister Scott Morrison cu Australia um Ramkomh Kawlram pumpak le a bu in minung pariat nih March 17 (cawn nili) ah tonnak an ngeih tiah theih a si.

Kan ram le miphun harsatnak le intuarnak kong he pehtlai in kan Prime Minister cu kan ton, biaruahnak kan ngeih tiah, tonnak ah a telmi Australia Chin Federation in Chairman Pu Renny Ceu Lian Mang nih The Chinland Post ah a chim.

“Salai Ram Tinthei (Cungpi) nih SAC ralhrang ralkap nih hramhram in uknak an lak ruang ah kan miphun nih harsatnak a tong mi hi kanmah tein kum khat fai kan bawm cang hna, Australia cozah nih Humanitarian aid le a dangdang in bawmhnak ding pek ding ah a chim” tiah Pu Renny Ceu Lian Mang nih a chimchap.

Cun, amah Pu Renny lila nih cun, Prime Minister sin ah cun “Thlantlang khua cu ralhrang hna nih an kan khangh piak dih ruang ah Thlantlang khua cu kan chuah tak i Mizoram ramri ah ralzam dirhmun in kan miphun nih intuarnak kong le India cozah nih zeihmanh bawmhnak a kan pe lonak kong. Atu tiang ah, miphun unau a si mi Mizoram lawng nih an kan bawmhnak kong a chim.

Hi tonnak ah, Prime Minister Scott Morrison nih an chimmi chung in bialehnak le biahalnak a tuah mi hna chung in, a biapi cu 1. UNHCR nih an in bawm hna maw? 2. Chin ralzam pawl khuai ka dah an um? timi a si. Cun, Bawmhnak phaisa cu zeitin dah nan kuat hna? timi hi a hal chih hna tiah theih a si.

Palai a tongmi hna nih, UNHCR le Ramdang in NUG pawl sin in zeihmanh bawmhnak hmuh lo nak kong le Chin ralzam kan umnak hmunhma cu Map in tha tein kan hmuh sak. Atulio ah, Ramkomh Kawlram cozah bank hman awk a tha lo caah agency in bawmhnak phaisa cu kan kuat nak kong cu an chimh.

Senator Dean Smith nih Chin miphun cu hmunkhat te ah lungrual tein an miphun caah rian a tuan cuahmah mi miphun an si, amah lila zong Chinram ah voi hnih a phanhnak kong, atu an chimmi vialte hi cozah nih theihpi tlak le cherhchan awk atlak mi Chin Human Right Organisation (CHRO) nih a khomhsuatmi le a thanh (update) a tuahmi lawngte a si tiah a chimh.

Senator Dean Smith le Hakha Zatlang Bu Upa cheukhat. Keimah pumpak zong CHRO nih an rak ka thanh lengmangmi a si, an rak ka pehtlaih lengmang tiah Prime Minister sin ahcun, Senator Dean Smith nih a chim.

Senator Dean Smith nih cun, Kawlram kong ah Australia um Chin upa pawl le CHRO he tonbiaruahnak kan ngei cang, cun tuan deuh ah Chin ralzam pawl caah Malaysia UNHCR zong ka rak ton bal cang hna tiah Senator Dean Smith nih Prime Minister a chimh chap.

Cu kong he pehtlai in, Prime Minister nih “Chin miphun caan saupi na rak bawm ca hna ah kaa lawm tuk, keimah zong kan Biakinn nih bawmhnak kan kuat bal hna,” tiah a ti. MP Vince Connelly nih Local Burmese Community hna nih an har nak le an herhmi bawmhnak an kan halmi cu fakpi in na ruah piak hna lai tiah ka zumh tiah a chimh fawn.

Prime Minister Scott nih Kawlram kong ah policy [Australia] ngeihmi zoh than nak kaa zuam lai , Humanitarian Visa le Humanitarian aid kong he pehtlai in tuanvo ngeitu hna le Kawlram lei kong a thei mi le Kawlram zong ah Ambassador a tuan balmi le Kawlram kong ah ruahnak petu ka hal lai a tiah tonnak a kalmi palai hna sin ah a chim.

A hlei in, Prime Minister nih tutan bia kan i ruah nak hi thaizing kiptuh ah tuah kho cawlh mi a si lo, dot khat hnu dot khat ni tuah a hau mi a si. Cun, hartong le Ralzam kong le a dangdang nan herhmi cu Senator Dean Smith le MP Vince Conaly sin ah rak chim hna uh law keimah le a dang tuanvo ngeitu hna sin ah an kan chimh than lai i data le update tuah khawh nak ding kan i zuam lai tiah Prime Minister nih a cahtak hna tiah theih a si.

Be First to Comment

Leave a Reply

Your email address will not be published.