Min Aung Hlaing Sal Pawl Sakhan In A Kuttang Riantuan An Zaam Hna
Shan ram Taawng (တအာင်း) hmunhma, Namhsan (နမ့်ဆန်) peng Namhkhe (နမ့်ခေး) khua SAC ralkap sakhan, battalion 252 in ralkap 4 cu a luancia April 4 ah khan a himnak hmun ah an zaam, tiah theih a si. SAC ralkap bawi hremnak kan intuar khawh ti lo caah kan zaam, tiah ralkap in a zaam mi hna nih cun an chim.
Luatnak a hmutu SAC ralkap pakhat nih cun, an umnak hmun ah harnak tampi an ton kong a chim i, sualnak an ngeih lo zong ah tukvelh an i huah peng i, biachimnak nawl zong an ngeih lo kong a chim. SAC ralkap a zaam mi hna nih cun an thlahlawh cu Ks 160,000 hrawng a si, ti in an langhter i, SAC ralkap kumkhat hrawng a ṭuan lio mi an si, tiah theih a si.
CDM a tuahtu ralkap 4 hna nih cun an uniform le hriamthil cu sakhan ah an chiah ta, tiah an chim. Namhkhe (နမ့်ခေး) khua SAC ralkap sakhan in a zaam mi dihlak hi ralkap 9 an si cang i, cu sakhan ah cun SAC ralkap minung 13 lawng an taang cang, tiah theih a si. Credit; The Chin Post
Thawai pengkomh ah SAC ralkap bawmchantu, leirawitu (dalan) tiah a min thang mi minung 15 cu zarhkhat chung ah meithal in kah an si. Cu chung ah cun minung 12 an thi, tiah theih a si. Cu thil cu March 27 in April 10 zinglei tiang ah a cang mi a si i, cu chung ah cun Lawnglung peng ah a tam bik thah a tong mi an si. Yephyu peng le Thawai pengzong ah thah a tong mi an um.
Thawai pengkomh mizapi vengtu ralkap hna nih SAC ralkap kuttang rianṭuantu khuabawi, leirawitu(dalan) le pyusawthi hna cu a rannak in an rian ngoltak ding in ralrin an pek hna caah cheukhat SAC ralkap rianṭuantu khuabawi hna nih cun an rian an dinhtak, tiah theih a si.
Paletwa Ah Thong Tla Mi Minung 27 Cu Sittwe Tong Ah Kuat An Si: Chin ramkulh, Paletwa ah phungrelnak 505 (a) in thong thlak a tong mi minung 27 cu Sittwe thong ah kuat an si, tiah an chungkhar hna sin in theih a si. April thla hramthok ah Paletwa peng biaceihzung nih anmah le sining cio in bia a khiahpiak hna i April 7 zaan ah Sittwe thong an phan, tiah theih a si.
“Thong tla mi hna hi anmah sual ruang i thong thlak mi an si ahcun kan i lungsak ko hnga, atu cu sualnak ngei lo an si caah nu hrin covo buarnak a si. Ralzam a bawmtu an si i ‘sualnak an tuah’ tiah fehternak zeihmanh a um lo. Atu bantuk in anmah(SAC) duh ning poh in bia an khiah hi cu nu hrin covo buarnak hrimhrim a si tiah,” tlaih a tong mi chungkhar in mi pakhat nih a chim.
Sittwe thong ah kuat mi thongtla hna hi ‘bomb puahnak’ ah lunghrinh mi minung 4, Paletwa ralkap sakhan thantar rang thlai kong he pehtlaih in pakhat, tualchung CDF a bawmtu ti in tlaih a tong mi 16 telh in, minung 27 an si tiah theih a si. Cu lak ah pa 25 le nu 2 an si, tiah theih a si. TCP
